Алматыда дәрігерлер бес жасар баланың үзіліп кеткен саусағын тігіп берді

Алматыда бес жасар баланың шынашағы темір қақпаға қысылып, жұлынып кетті. Әкесі баласын жұлынған саусағымен бірге №2 қалалық балалар клиникалық ауруханасына жеткізген. Онда хирургтер бірнеше сағат бойы тамырларды, жүйке мен сіңірлерді қалпына келтіру операциясын жасады.

Саусақты қалай сақтап қалу мүмкін болды және дәрігерлер оны қайта тіге алуы үшін жұлынған дене мүшелерін қалай дұрыс сақтау және тасымалдау керектігін Tengri Health тілшісі анықтап көрді.

Саусақ қақпаға қысылып қалған: оқиға қалай болды?

Алматы қалалық №2 клиникалық ауруханасының баспасөз қызметінің ақпаратынша, баланың оң қолының шынашағы темір қақпаға қысылып, толығымен жұлынып кеткен.

Әкесі баланы және жұлынған мүшені ауруханаға өзі әкелген - ол шынашақты стерильді бинттің целлофан пакетіне салып қойған. Жарақаттың ауырлығын және тіндердің тіршілік қабілетін қалпына келтіруге уақыттың шектеулі екенін ескере отырып, дәрігерлер бүлдіршінге шұғыл операция жасау туралы шешім қабылдады.

Микроскоп астындағы төрт сағаттық жұмыс

№2 балалар қалалық клиникалық ауруханасының травматология бөлімінің меңгерушісі Ерлан Садырбалин бұл бүкіл топтың барынша жедел әрі үйлесімді іс-қимылын талап ететін күрделі жағдай болғанын айтты.

"Жұлынған фрагмент өңделіп, арнайы сақтау ортасына орналастырылды. Ал бала операцияға дайындалды", - делінген хабарламада.

Дәрігерлерге саусақты қалпына келтіру үшін төрт сағат қажет болды.

"Хирургтар жай көзге көрінбейтін өте жіңішке хирургиялық жіптерді пайдаланды. Оларды тек арнайы медициналық микроскоптың көмегімен ғана көруге болады", - деп толықтырды аурухананың баспасөз қызметі.

Дәрігерлер диаметрі небәрі бір миллиметр болатын артерияны, сондай-ақ сіңірлерді, жүйке мен венаны қалпына келтіріп, жұлынған саусақтың қан айналымы мен өміршеңдігін қамтамасыз етті.

Операциядан кейін мамандар шынашақтың қалай бітіп жатқанын және қолдың жұмыс істеу қабілетінің қалпына келуін бақылады.

Алматы қалалық №2 балалар клиникалық ауруханасының директоры Марат Рабандияров балаларға жасалатын мұндай операциялар реконструктивті және микрохирургиялық көмектің ең күрделі түрлеріне жататынын атап өтті:

"Мұндай жарақаттардан кейінгі әрбір минут шешуші мәнге ие. Емдеудің сәтті болуы жұмыстың нақты ұйымдастырылуына және мамандардың өзара іс-қимылына, медициналық көмек көрсетудің жеделдігіне, жұлынған сегменттің дұрыс тасымалдануына тікелей байланысты".

Баланы емдеу МӘМС шеңберінде жүргізілді.

Жұлынған фрагментті қалай сақтау және тасымалдау керек?

Ерлан Садырбалин мұндай жарақаттар кезінде дененің жұлынған бөлігін дұрыс орап, салқындату маңызды екенін түсіндірді.

Алдымен оны құрғақ майлыққа орап, целлофан пакетке салу керек. Пакеттің аузын нығыздап байлап, оны салқын суы бар басқа пакетке салып, оны да тығыз жабу қажет. Осыдан кейін ғана оны мұзы бар ыдысқа салуға болады.

Жұлынған саусақ немесе дененің басқа бөлігі ауруханаға жеткізілгенде, оны операцияға дейін тоңазытқышқа қоюға болады.

Дәрігердің айтуынша, егер осы шарттар сақталса, жұлынған саусақты 24 сағатқа дейін сақтауға болады. Аяқ-қолдың ірі бөліктерін әлдеқайда тезірек - екі-үш сағат ішінде жеткізу керек.

Бізді Google-дың негізгі дереккөздер тізіміне қосыңыз

Қосу

Алматы

дәрігер

дәрігерлер