Алматыда Хакім Абай мұрасы көрмесі ашылды

Алматыда Абай Құнанбайұлының 180 жылдық мерейтойына орай «Хакім Абай мұрасы» атты көрме ашылды.

Оған ұлы ақынның өмірі мен шығармашылығына қатысты жәдігер қойылды. Ділдәнің домбырасын, Абайдың  бүркітінің балдағы мен тоғызқұмалағын, інісі Ысқақтың бөрігін және Абай әулеті мен туысқандары жөнінде шежірелерді, тарихи фотосуреттерді осы көрмеден тамашалауға болады. Сонымен қатар Абайдың ұлы Мағауияға жазған хаты, қол қойған құжаттар, ақынға берілген мінездеме сияқты ақын дәуірінің бет-бейнесін көрсететін этнографиялық жәдігерлер бар. Қолжазбалар,  кітаптар мен ақын туралы жазылған шығармалар да қойылған. Көрме жыл соңына дейін жалғасады.

Жасұлан Белтенов, ҚР Ұлттық орталық музейінің бөлім жетекшісі:

- Бұрын соңды зерттелмеген мұралары зерттелсе де, толықтай зерттелмеген мұралары қойылып отыр. Оның ішінде атап өтетін болсақ, «Қазақтың түбі қайдан шыққандығы туралы біраз сөз» деген Абайдың ғалымдар тарапынан өзінікі деп телініп жүрген қолжазбасы, Абайдың ұлы Тұрағұл «Қазақтың ақыны Абай Құнанбайұлы» деген қолжазбалары, яғни онда 146 өлеңі мен 41 қара сөзі қамтылған және Нұрсейіт Бікеұлының онда да Абай шығармалары қамтылған.