Алматыда инватакси саны артты

Алматыда инватакси паркі жаңа көліктермен толығып, жалпы саны 170-ке жетті. 

Соның нәтижесінде арнайы таксиді қолданатын мүгедектігі бар жолаушылар саны 2 мыңнан 3,5 мыңға дейін өскен. Енді даун ауруына шалдыққан балалар да әлеуметтік такси шақыра алады. Келер жылдан бастап психикалық ауытқуы бар бүлдіршіндерді де тасиды. Сонымен қатар диспетчерлік қызмет автоматтандырылады. Осылайша инватаксидің жүрісі онлайн бақыланып, қызмет көрсету жылдамдығы арта түседі. Ережеге сәйкес «инватакси» қызметін үкіметтік емес ұйымдар көрсете алады.

Аманат Сұлтанғазиев, Жұмыспен қамту және әлеуметтік бағдарламалар басқармасы басшысының орынбасары:

- Көлік министрінің 859-бұйрығында инватакси қызметін көрсету ережесі жазылған. Бұл қызметті мүмкіндігі шектеулі адамдарды тасымалдаумен айналысатын үкіметтік емес ұйымдар мемлекеттік тапсырыс арқылы жүргізеді. Оның талаптары мынадай: мүмкіндігі шектеулі адамдарға арналған көлік, материалдық-техникалық база, диспетчерлік қызмет пен тәжірибелі жүргізушілер болуы керек.