Алматыда кино түсіріп жүрген 52 адам пойызда уланып қалды

АЛМАТЫ, 11 желтоқсан – Sputnik. Алматыда темір жолда кино түсіреміз деп 52 адам уланып қалды, деп хабарлайды Sputnik Қазақстан тілшісі.

Оқиға Алматы-2 темір жол вокзалында болған. Оқиға орнына 13 жедел медициналық жәрдем бригадасы жіберілген.

"52 адам зардап шекті, оның ішінде балалар бар. Зардап шекендердің барлығы тексеру жүргізу және қажетті медициналық көмек көрсету үшін қала стационарларының қабылдау бөлмелеріне жеткізілді", - дейді Алматы қалалық денсаулық сақтау басқармасы.

Тексеру нәтижесі бойынша 10 бала ауруханаға жатқызылды, оның 2-і жансақтау бөлімшесінде, қалғандары бейінді бөлімшелерде.

Қалған пациенттер тексеруден және көмек көрсетуден кейін тұрғылықты жері бойынша амбулаториялық емделуге жіберілді. Ауруханаға жатқызылған науқастардың жағдайы дәрігерлердің бақылауында.

Қазақстан темір жолы пойызда болған жағдайдың өздеріне еш қатысы жоғын айтады.

"Алматы-2 теміржол вокзалында көміртегі тотығымен улану оқиғасына ұлттық тасымалдаушының қатысы жоқ. Адамдар уланған пойыз жеке тасымалдаушыға тиесілі, "Жолаушылар тасымалы" АҚ-ға қарамайды. Киностудияға вагондар түсірілім жүргізуге берілген", - дейді компания.