Алматыда пойызда уланғандар мән жайды баяндады

Алматыда пойызда уланып, жансақтау бөліміне түскен екі жеткіншек бүгін палатаға ауыстырылды, деп хабарлайды 24KZ. «Ауруханадағы 11 баланың жағдайы орташа ауырлықта, тұрақты», – дейді дәрігерлер. Тілшіміз вагондағы кино түсірілімінде болған ересек адамдармен кездесіп қайтты. Олар әлі де бастары айналып, жағымсыз иістен айыға қоймаған.

Нұргүл Мейірханованың фильмдердің көпшілік сахнасына түсіп, қосымша табыс тауып жүргеніне көп жыл болған. «Үнемі жақсы өтетін», – дейді ол. Кешегі түсірілімге де әдеттегідей жиналған. Алайда вагонның суығы сүйектен өткені өз алдына, газдан уланып, ауруханадан бір-ақ шыққан.

Нұргүл Мейірханова, зардап шегуші:

- Үш вагон болды. Екеуі жылытылмаған, өте суық. Біреуінде біз тоңып отырдық, демімізден бу шығып тұрды, кеше өте суық болды. Ал екінші вагонда корейлік түсірілім тобы отырды. Олар отырған вагон жылы болды. Үшінші вагонда түсірілім жүріп жатқан, мен кіргенде вентилі бар үлкен газ баллонды көрдім, шынымды айтсам, қорықтым. Десе де жақындап, жылынуға тырыстық. Сол кезде екі қыз есінен танып құлады. Олардың бетіне су бүркіп, есін жиғызуға тырысты.

Куәгердің айтуынша, шетелдік киностудия өкілдері түсірілімге қатысушылардың телефондарын жинап алған. Айтуларынша, фильм 2000-шы жылдарды бейнелейді. Суық болғанына қарамастан түсірілім тобы жеткіншектерге сырт киімі мен аяқкиімін шешіп, вагонның жоғарғы қабатына жатуды талап еткен. Сол жерде болған Роман Муратовтың айтуынша, 50 шақты адам газбен жылитын пештің жанында 30 минуттай отырған.

Роман Муратов, куәгер:

- Балалар да есінен тана бастады. Бойымызды үрей биледі. Сол кезде ғана бәріміз газдан уланғанымызды түсіндік. Содан соң бізді жылы вагонға апарды. Біз сонда 20-30 минуттай отырып, Алматы-2 вокзалына дейін бардық. Өйткені медициналық көмек тек сонда болды. Менің де басым айналып, әлсіреп қалдым. Вокзалға түскенде аяғым дірілдеп, жүре алмай қалдым. Бір кезде есімнен танып қалдым. Содан соң біреу қатты сілкіп оятып: «Ұйықтама! Газдан улансаң, оянбай қалуың мүмкін!» – деді.

Бірінен кейін бірі жағдайы нашарлай бастаған адамдар Алматы-2 вокзалынан жедел жәрдеммен ауруханаға жеткізілді. Алматыдағы балалар шұғыл медициналық көмек орталығына түскен 11 баланың екеуі жансақтау бөліміне жатқызылған еді. Бүгін олар палатаға ауыстырылды.

Құрметбек Тоқтарұлы, Алматыдағы балалар шұғыл медициналық көмек орталығы директорының орынбасары:

- Балалардың жағдайы орташа ауырлықта. Тұрақты. Жансақтау бөлімінде жатқан екі бала бүгін токсикология бөлімшесіне ауыстырылды. Қазіргі таңда балалардың өміріне қауіп төніп тұрған жоқ.

Түсірілімге қатысушыларды Алматыдағы «Кастинг ВВ» агенттігі шақырған. Олар арнамызға сұхбат беруден бас тартты. Оқиғаға байланысты кеше Желілік полиция басқармасы Еңбекті қорғау қағидаларын бұзу бабы бойынша қылмыстық іс қозғады. Қазір тергеу жүріп жатыр. Ал ауруханадағы балаларға дүйсенбі күні қорытынды сараптамалар жасалады. Үйлеріне шығару туралы сол сараптамадан кейін белгілі болады.

Авторлары: Гүлжан Көленқызы, Мұхит Құдықбаев