Алматыда Шымбұлақтың өткізу қабілетін бес есе арттыру жоспарлануда

Алматыда "Шымбұлақ" пен Oi-Qaragai курорттарын "Медеу" базалық станциясымен біріктіру арқылы тау туризмі инфрақұрылымын дамытудың ауқымды жобасын іске асыру жоспарланып отыр, деп хабарлайды Tengri Travel inalmaty.kz сайтына сілтеме жасап.

Жоба аясында 30 жаңа аспалы жол салу, 151 шақырым тау шаңғысы трассасын ашу және қолданыстағы инфрақұрылымды жаңғырту көзделген.

Нәтижесінде, жоба авторларының есебінше, тау шаңғысы жүйесінің өткізу қабілеті қазіргі 6 мыңнан тәулігіне 30 мың келушіге дейін, яғни бес есе артуы тиіс.

Сонымен қатар Алматыда Алматы тау кластерін 2029 жылға дейін дамытудың кешенді жоспары әзірленді. Құжат жеті негізгі бағыт бойынша 73 іс-шараны қамтиды.

Жоспарда тау инфрақұрылымын дамыту, тау шаңғысы курорттарының бірыңғай жүйесін құру, жаңа аспалы жолдар салу және туристік маршруттар желісін кеңейту қарастырылған.

Туризм басқармасы жоспарланған жобаларды іске асыру шетелдік туристер ағынын 986 мыңнан 1,7 миллион адамға дейін, яғни екі есеге жуық арттыруға мүмкіндік береді деп күтеді. Сондай-ақ туризм саласындағы жұмыспен қамтылғандар саны 101,8 мың адамға дейін өседі деп болжанған.

Google News арқылы жаңалықтарымызды қадағалаңыз