Алматыда жаңа арқан жолдардың құрылысы үшін жер телімдері алынады

Алматы қаласы әкімдігінің 2026 жылғы 27 сәуірдегі № 2/195-562 қаулысына сәйкес, Алматы тау кластерін қалыптастыру, арқанды жол базалық станцияларының құрылысы үшін Медеу ауданы, Алма-тау көшесі бойында орналасқан 4 жер учаскесі мемлекет мұқтажына алынады. Мәжбүрлеп иеліктен шығару мерзімі 2027 жылдың 31 желтоқсанына дейін белгіленген.

«Қала жер орталығы» кәсіпорны заңнамада белгіленген тәртіппен меншік иелерін хабардар етеді. Ал Алматы қаласы жер қатынастары басқармасы заңнамамен белгіленген тәртіпте жер учаскелерінің меншік иелеріне өтемақы төлейді. Жер телімдері толық сатып алынғаннан кейін Алматы қаласы туризм басқармасының теңгеріміне өтеді.

Еске салайық, Алматы тау кластерін дамытуға 526 млрд теңге жұмсалады. Жоба аясында тау шаңғысы курорттары кеңейтіледі және бірыңғай жүйеге біріктіріледі. 30 аспалы жол және 161 шақырым жаяу жүргіншілер жолы салынады. Бұл бір жылда 5 миллион турист келуіне мүмкіндік береді. Оның 1,7 миллионы шетелдік саяхатшы болады деп болжанып отыр.

Премьер-министр Олжас Бектенов Алматы тау кластері мен Almaty Superski жобаларын жеделдетуді тапсырды.