Алматыда жаңа стадион 35 мың орыннан көп болуы мүмкін бе

Алматыда жаңа футбол алаңы салынатыны туралы жаңалық қоғамда кеңінен талқыға түсті. Спорт сарапшылары мен футбол жанкүйерлері әлеуметтік желіде 2,2 млн тұрғыны бар қалаға 35 мыңдық стадион шағын болатынын айтып, алаң сыйымдылығын көбейтуді ұсынды.

Осыған орай, Kazinform агенттігі «жаңа стадион 35 мың орыннан көп болуы мүмкін бе?» деп қала басшылығына сауал жолдады. Ресми жауап қалалық құрылыс басқармасынан келді.

- Қазіргі уақытта бекітілген жобалауға арналған тапсырмаға және алдын ала әзірленген эскиздік жобаға сәйкес, жаңа стадионның сыйымдылығы 35 000 орын болып белгіленген. Жобалау-сметалық құжаттаманы әзірлеу бойынша мердігер ұйыммен келісімшарт осы жылдың қараша айына дейін жасалатын болады. Жобалау жұмыстарының көлемі мен мерзімі аталған келісімшарт шеңберінде жүзеге асырылады, - делінген басқарма жауабында.

Ведомство жаңа стадион УЕФА-ның 4-санат талаптарына сай етіп салынатынын мәлімдеді. Жобада шынайы табиғи шөп жабыны бар футбол алаңы қарастырылған.

Сондай-ақ жобалық шешімге сәйкес, стадионға келушілер үшін 1 мыңнан астам көлікке арналған автотұрақ орындары жоспарланған.

Еске салайық, Алматыда жаңа стадион Құлжа мен Талғар тас жолдарының арасында, 15 гектар жерде салынатынын жазғанбыз.

Сондай-ақ биыл жаңа стадион құрылысына байланысты алғашқы жұмыстар басталатынын жазған едік.