Алматыда Непалдағыдай жойқын сценарий болуы мүмкін бе

Непал мен Қытай шекарасында болған апатты сел мен су тасқынынан кейін қазақстандық сарапшылар Алматы тауларын Гималаймен салыстырып, қалаға төнуі ықтимал қауіп туралы айта бастады, деп хабарлайды Tengrinews.kz КТК телеарнасына сілтеме жасап.

Геологтардың пікірінше, дәл қазір Алматыға тікелей қауіп төніп тұрған жоқ. Дегенмен ықтимал қатерді де жоққа шығаруға болмайды. Өйткені Алматы тауларында да белгілі бір жағдайда жойқын селге себеп болуы мүмкін мұздықтар, тау көлдері мен тұрақсыз беткейлер бар.

"Бұған дәлел болатын жағдай – Алматыда нөсер жауын жауған кезде дәл осы Наурызбай ауданын су баса бастауы. Мұны тұрғындар жақсы біледі. Ал "Ақсай" бөгетіне қатысты мәселе 2024 жылы өзекті болған. Бөгет әлі күнге дейін салынып біткен жоқ", - дейді геолог-физик Арман Серғазин.

Дегенмен құтқарушылар алматылықтарға алаңдауға негіз жоқ екенін айтады. Селден қорғау саласының мамандары тау көлдері қауіпті кезең бойы жіті бақылауда болатынын жеткізді. Қауіпті су айдындары әуеден тексеріліп, қажет болған жағдайда ондағы су деңгейі алдын ала төмендетіледі. Сондықтан дәл қазіргі уақытта Алматыда Непалдағыдай сценарий болуы мүмкін деген болжам жоқ.

"Қазір таудағы жағдай тұрақты және біздің бақылауымызда. Қауіпті көлдерге тұрақты мониторинг жүргізіліп отыр. Қажет болған жағдайда мамандар су деңгейін алдын ала төмендетіп, эвакуациялық арналарды тазарта алады", - деді "Қазселденқорғау" ММ Алматы филиалы басшысының орынбасары Әлішер Тоқтасын.

Еске салайық, 26 тамызда таңертең Қытай мен Непал шекарасындағы Гьиронг (Цзилун) бақылау-өткізу пункті маңында, Тибет автономиялық ауданында жойқын сел жүріп, Непалдың солтүстігінде су тасқыны болған.

Су, лай мен үйінді аралас қуатты ағын Бхотекоши және Тришули өзендерінің аңғарындағы елді мекендерді басып, жүздеген адамның өмірін қиды. Апат салдарынан үйлер, жолдар мен көпірлер қирады.

28 тамыздағы мәлімет бойынша, Непалдың солтүстігіндегі су тасқынынан қаза тапқандар саны 579 адамға жеткен. Ал 1924 адам хабар-ошарсыз кеткендер қатарында.

Жоғалғандар арасында екі қазақстандық әйел де бар. Олар Непал мен Қытай шекарасындағы табиғи апат аймағында болуы мүмкін. Екі азамат та жақындарымен байланысқа шығуды тоқтатқан. Бұған дейін олардың бірінің туристік топ құрамында Непалдан Қытайға қарай шекара асқаны хабарланған.

Google News арқылы жаңалықтарымызды қадағалаңыз