Алматыдағы жылу электр орталықтары қашан газға ауысады

Жыл басында Энергетика министрі Ерлан Ақкенженов Алматыға жұмыс сапарымен келіп, ЖЭО-2 және ЖЭО-3 құрылыс алаңдарын аралап шықты. Ведомство басшысы ЖЭО-2 нысанында оң динамика бар екенін айтса, ал ЖЭО-3 құрылыс алаңындағы жағдайды қатаң сынға алған болатын. Министр кей жұмыстардың кестеден қалып келе жатқанын атап өтті. 

Осы орайда, Kazinform агенттігі энергетикалық тораптарға иелік ететін «Алматы электр станциялары» АҚ (АлЭС), сондай-ақ құрылыс қарқынын бақылау ұстап отырған Энергетика министрлігіне жүгініп, Алматы экологиясы үшін маңызы жобалардың қандай сатыда екенін сұрады.

АлЭС даму және құрылыс жөніндегі басқарушы директоры Ержан Бурамбаевтың жауабына сәйкес, ЖЭО-2 нысанын газға көшіру жобасының дайындық деңгейі – 64%. Қазіргі уақытта қадаларды құю, іргетасты орнату, су жылыту қазандықтарын монтаждау және гидравликалық сынақтан өткізу жұмыстары аяқталған. Қазандықтардың түтін шығаратын айналмалы құбырларының металл конструкцияларын монтаждау процесі жүріп жатыр.

– ЖЭО-2 жұмыс алаңында қазіргі уақытта 1500-ге жуық адам еңбек етіп жүр. Нысанды газға көшіруге қажетті материалдар мен жабдықтар 99% көлемінде сатып алынып, мекенжайға жеткізілді, - деді ол.

Сонымен қатар Ержан Бурамбаев екінші жылу электр орталықты газға толық көшіріп, оны пайдалануға беру 2026 жылдың желтоқсан айына жоспарланғанын атап өтті. Оның айтуынша, құрылыс-монтаждау жұмыстары кестеге сай жүріп жатыр және белгіленген мерзімдерден ауытқу күтілмейді. Бекітілген кестеден қалыс қалу деректері жоқ.

Ал агенттік сауалына берген жауабында Энергетика министрлігі ЖЭО-2 бойынша бас корпус аймағында үш газ турбинасы, төрт су жылыту қазандығы орнатылып, гидравликалық сынақтар аяқталғанын хабарлады. Қазір қазандықтың бас корпусын жабу жұмыстары қалған. Ведомство министр тарапынан сын айтылған ЖЭО-3 бойынша да жауап берді. Бұл жылу электр орталығы да 2026 жылдың соңына дейін толық газға ауысуы тиіс.

– ЖЭО-3 нысанында Ansaldo Energia компаниясының турбинасы мен генераторының алғашқы жиынтығы іргетасқа орнатылды. Турбинамен мен генераторының екінші жиынтығы мердігер қоймасына жеткізілді. Энергетика министрі Ерлан Ақкенженовтың жұмыс сапары барысында берген ескертулері мен тапсырмаларына сәйкес, екі жоба бойынша да жұмыс кестелеріне түзетулер енгізілді. Мердігер ұйымдар тарапынан қосымша жұмыс күші мен техника жұмылдырылып, жұмыстар екі ауысымда ұйымдастырылды, - делінген министрлік жауабында.

Еске салайық, Алматының жылу электр орталықтарын газға ауыстыру мәселесі көп жылдан бері талқыланып келеді. 2020 жылы Үкімет Алматы ЖЭО-2-ні газдандыру жобасы мақұлданды. 

2022 жылы 25 қарашада «Алматы электр станциялары» АҚ (АлЭС) мен Еуропа Қайта құру және Даму банкі (ЕҚДБ) арасында «Қоршаған ортаға тигізетін әсерін барынша азайту арқылы Алматы ЖЭО-2-ні жаңғырту» жобасын қаржыландыру туралы кредиттік келісім жасалды. Аталған мәміленің сомасы – 130 млрд теңге. 

2023 жылы Алматының ЖЭО-2 нысанын көмірден газға ауыстыру тендерін консорциум жеңіп алды. Консорциум құрамына үш қытайлық компания кіреді: Dongfang Electric International Corporation, Powerchina Sepco1 Electric Power Construction Co., Ltd және Powerchina Hebei Electric Power Engineering Co., Ltd. 

ЖЭО-2-ні газға көшіру бойынша құрылыс жұмыстары 2024 жылы басталды. Алматы экология департаментінің мәліметінше, жоба жүезе асқан соң, ауаға тарайтын зиянды заттардың мөлшері жылына 37 мың тоннадан 2,7 мың тоннаға дейін азаяды.