Алматы жылу электр орталықтары қашан газға көшіріледі

— Бүгінде «Самұрық-Энерго» ауқымды инвестициялық бағдарламаны іске асырып жатыр. Компания портфелінде 34 инвестициялық жоба бар. 2032 жылға дейін пайдалануға беру жоспарланып отырған жалпы белгіленген қуат 11,5 гигаватт жаңа генерацияға тең. Бұл 14,5 трлн теңге. Егер жалпы алып қарайтын болсақ, Қазақстанның энергетика саласында жүзеге асырылып жатқан барлық инвестициялық жобаның 60 пайызы «Самұрық-Энерго» жобаларына тиесілі, — деді компания басшысы «Самұрық-Қазына» АҚ қоғамдық кеңесінің отырысында.

Оның атап өтуінше, ең маңызды жобалардың бірі — Алматы қаласын газдандыру. Оны 2026 жылы аяқтау жоспарланып отыр.

— ЖЭО-2 мен ЖЭО-3 газға көшірілетін болады. Бұл жобалар келер жылдың соңына дейін аяқталып, газ стансасы іске қосылады. Өздеріңіз де білесіздер, орталықтарда ең заманауи технологиялық жабдықтар орнатылады. ЖЭО-2-де — бұл Siemens турбинасы, ал ЖЭО-3-те — Ansaldo турбинасы. Алматы жылу орталықтарын жаңғыртудың үлкен әсері болады деп күтеміз, — деді Қайрат Мақсұтов.

Айта кетелік проблемалық тоғыз ЖЭО қызыл аймақтан шығарылған еді.