Алматылықтарға ауруханаға бармай ақ денсаулығына қаратуына мүмкіндік туды

Алматылықтарға ауруханаға бармай-ақ медициналық кеңес алуына мүмкіндік туды. Ол үшін 1312 нөміріне хабарласу жеткілікті. 
Алматы қаласында цифрланған медициналық қызметтердің жаңа бір түрі – Almaty Digital Medical Center (ADMC) базасы жұмысын бастады. Заманауи медициналық орталықтың операторлары тұрғындардан қоңырау қабылдап, дәрігерлері онлайн кеңес береді. Бірінші желіде медициналық білімі бар мамандар отырса, екінші желіде лицензиясы бар дәрігерлер жұмыс істейді. Атап айтқанда, терапевт, педиатр, гинеколог, уролог, хирург, психиатр және басқа да мамандар кеңес беруге әзір.  

Мұндай орталық Алматы қаласы Қоғамдық денсаулық сақтау басқармасы мен Цифрландыру басқармасының қолдауымен құрылған екен. Мақсаты – әрбір тұрғынға медициналық көмекті жылдам әрі қолжетімді ететін бірыңғай цифрлы экожүйе қалыптастыру. ADMC платформасына қаланың 8 емханасы қосылған. 

Цифрландырылған медорталық негізінен шұғыл көмекті қажет етпейтін науқастарға кеңес береді. Сондай-ақ, дәрігерге жазылуына, дәріхана мен зертханаларды табуына, қажет жағдайда бейінді мамандарды тауып беруге көмектеседі. Емханаға тіркелудің тәртібін түсіндіреді. Мұндай онлайн қызмет емханадағы кезекті, шұғыл көмек көрсету жүктемесін азайтуға септігі тиеді деген оймен жасалған. Сондай-ақ, науқастарды нақты уақыт режімінде бақылап отыруға мүмкіндік бермек. Қазан айының өзінде ғана орталыққа 50 мыңнан астам қоңырау келіп түскен екен. 

Алматы қаласы әкімдігінің мәліметінше, орталық көбіне жүкті әйелдерді бақылауда ұстауға ерекше көңіл бөлетін көрінеді. Ай сайын 3200-ден аса жүкті әйелді бақылауда ұстап отыратын көрінеді. Босанғаннан кейін де 42 күн бойы бақылауда болады екен. Әсіресе, босанғаннан кейінгі жай-күйді бақылау көрсеткіші әлдеқайда өсіп, 28%-дан 81%-ға дейін артқан. 

Жүкті әйелдерден бірге созылмалы ауруға шалдыққан науқастарға да бақылау күшейтілген. Орталықтың арқасында ондай пациенттерді қарау мен бақылау көрсеткіші 27%-дан 48%-ға дейін өскен екен. 

Орталыққа кез келген тұрғын хабарласа алады. Бірыңғай байланыс орталығының телефон нөмірі – 1312.

Мемлекет басшысы Қасым-Жомарт Тоқаев биылғы 8 қыркүйектегі жолдауында цифрландыру мен жасанды интеллектіні экономиканың түрлі салаларына жаппай енгізуді, сол арқылы халықтың өмір сапасын жақсартуды тапсырған еді. Медицина қызметтері халық өмірі мен ұлт денсаулығына тікелей әсер ететін қызмет түрі болғандықтан, оның сапасын жақсарту және қолжетімділігін оңайлату аса маңызды.