Алтайда қазақстандықтар мінген көлік жол апатына түсті екі адам ауруханада көз жұмды

АСТАНА, 28 шілде – Sputnik. Алтай Республикасында Қазақстан азаматтары мінген көлік жол апатына түсті, деп хабарлайды Sputnik Қазақстан осы елдің ішкі істер министрлігінің ресми сайтына сілтеме жасап.

Қайғылы оқиға 27 шілде күні кешкі уақытта Акташ ауылының жанында болған. Сол жерде тұратын 31 жастағы әйел Toyota Avensis көлігімен жолдың қарсы бетіне шығып, Chevrolet Nexia-мен соқтығысқан. Ол көлікте Қазақстанның бес азаматы - 40 жастағы көлік иесі, 44 жастағы әйел, 63 жастағы екі ер адам және 13 жастағы қыз болған.

Барлығы шұғыл ауруханаға жеткізілген. Бірақ екеуі - 40 жастағы ер адам мен 44 жастағы әйел ауыр жарақаттан қайтыс болды.

Toyota-да болған 21 жастағы жолаушы да ауруханаға жатқызылды. Ал рөлде болған әйел ауыр жарақат алған жоқ. Оны ауруханаға жатқызудың қажеті болмады.

"Тексеріс кезінде әйелдің рөлге мас күйінде отырғаны анықталды. Оның көлік жүргізуге құқығы да болмады", - делінген ресми хабарламада.

Қазіргі кезде сотқа дейінгі тергеу басталды. Соның нәтижесінде процессуалдық шешім қабылданады.