Алты ғасырға ұласқан еңбек әулеті

Солтүстік Қазақстан облысында ауыл шаруашылығы саласына 6 ғасырын арнаған еңбек династиясы тұрады.

Әке жолын қуған Мұрат Қаражұманов өмір бойы механизатор болып жұмыс істеп келеді. Қазір оның ізін ұлы басып, мал фермасында еңбек етеді. 

Мұрат Қаражұманов егін шаруашылығына 40 жылға жуық өмірін арнаған жан. Біраз жыл комбайн тізгіндеді. Ал қазір қырдағы астықты жүк көлігіне артып қырманға тасиды. Ол үшін биыл кезекті орақ науқаны аяқталды. Білікті механизатор бос уақытында Абайдың шығармаларын оқып, көңілге тоқиды.

Мұрат Қаражұманов, механизатор:

- Абай атамыздың айтқаны бар ғой: «еңбек етсең ерінбей, тояды қарның тіленбей» деген. Сол сияқты мынау еңбектің бүкіл осының бәрі еңбектің арқасы. Мынау енді қанша істеген еңбегіміздің нәтижесін көріп жатырмыз. Биыл ауа райының қолайсыздығына қарамастан астықты жинап, уақытында қоймаға құйып алдық. Биылғы өніміміз жақсы шықты. Сол бәрі еңбектің арқасы ғой. Таңның атысы, күннің батысы сол жұмыста трактор тізгінінде жұмыс істеп келдім тер төгіп. 

Бұл әулеттің ауыл шаруашылығы саласындағы жалпы еңбек өтілі 600 жылдан асады. Оның ішінде Мұрат Қаражұмановтың қосқан үлесі мемлекет тарапынан жоғары бағаланып, үшінші дәрежелі «Еңбек Даңқы» орденімен марапатталды. Ұрпақ сабақтастығын ұлы Мақсат та үзбей, өзін осы саладан тапты. Кішкентай кезінен әкесін үлгі тұтқан ол қазір мал фермасында жұмыс істейді. 

Мақсат Мұратұлы, мал азығын дайындау цехының операторы:

- Әкеміз еңбекқор. Әкеміз осы кішкентай кезімізден ақыл үйретіп, тәрбиелеп, соған әкемізге қарап, үлгі алып, жұмысында жақсы жұмыс істеп бізге үйретіп келе жатыр. Үйде таңғысын ерте кетіп, кешкісін қараңғы түскенде келеді жұмыстан. Әкемізге қарап, осы шаруашылықта жұмыс атқарып келемін. 

Қаражұмановтар отбасы «Мәмбетов және К» командиттік серіктестігінде жұмыс істейді. Биыл олар 26 мың гектар жерге дән сіңіріп, мол өнімге қол жеткізді. Қазір орақ науқанын толық аяқтап, астықты шашау шығармай жинап алды.

Құсайын Ахметов, "Мәмбетов и К" командиттік серіктестігінің атқарушы директоры:

- Дәнді дақылдар жоғары нәтиже көрсетті. Мысалы, қатты бидай әр гектарынан орташа есеппен 30 центнерден өнім берді. Майлы дақылдар да жақсы шықты. Бұл ретте мемлекеттің қолдауы зор болды. «Кең дала» бағдарламасының арқасында көкөтемгі және күзгі дала жұмыстарын уақытылы атқардық. Біздің компанияда Қаражұмановтар династиясы көптен бері жұмыс істейді. Олардың еңбегі ерен. 

Осы жылы Мемлекет басшысының тапсырмасымен солтүстік қазақстандық диқандарға 160 млрд теңге қаржылай қолдау көрсетілді. Шаруаларға «Кең дала» бағдарламасы бойынша жеңілдетілген несиелер берілді. Осының арқасында биыл облыс бойынша 6 млн тоннадан астам астық жиналды. 

Айдарбек Айтмұхамбетұлы, Төлеген Иманов