Аң құсқа да қамқорлық қажет

Ақтөбедеге жас натуралисттер станциясында 14 бүркіт пен дала қыранын қыстауға қалған. Қанаты қайырылып, аяғы жараланған жыртқыш құстарды табиғат жанашырлары күтеді. Балаларға қосымша білім беру орталығы жүзге жуық жан-жануарға пана болған. 

Көк аспанның иесі, еркіндіктің символы – дала қырандары темір торда отырса да көзінің отын, тәкәппар мінезін жоғалтпаған. Дені қантүбіт, тастүлек жасында. Яғни 2-3 жыл бұрын ғана қанаты қатайған. Түрлі жарақат алған жыртқыш құстарды табиғат жанашырлары жеткізіпті.

Мансұр Есқожин, тілші:

- Жас натуралисттер станциясындағы жан-жануарлардың барлығын тұрғындар әкеліп тапсырған. Мәселен, мына аққудың қанаты сынған және көжек кезінде қызықтап, кейін қажет болмай қалған үй қояндары бар. Батпақта өмір сүретін қара тасбақалар мен тұщы суды мекендейтін қызыл құлақты мынадай тасбақалар бар. 

Орталықтың зоолог-әдіскері Анатолий Осколков олардың әрқайсысы туралы сағаттап әңгімелеуге бар. Жануарлар мен құстардың мінезі мен ерекшелігі, қылықтарын майын тамыза жеткізеді. Отыз жылға жуық мектепте ұстаз болған маман: «Балаларға қоршаған ортаны таныстыруды ұнатамын», - дейді. 

Анатолий Осколков, жас натуралистер станциясының әдіскер-зоологы:

- Балалар жан-жануарларды жақсы көреді. Табиғи қорықтар мен зообақтар, жалпы қоршаған орта өскелең ұрпақты тәрбелеуде маңызды орын алатындығы бекер емес. Сондықтан балаларға табиғатты құрметтеп, жануарлар, құстар және өсімдіктер әлеміне қамқорлық танытуды кішкентай күнінен үйретуіміз қажет. 

Ақтөбеде жас натуралисттер станциясы 1953 жылы ашылған. Қосымша білім беру орталығы балалардың сүйікті демалыс орнының біріне айналды. Бүлдіршіндер түз жануарларын тамашалап қана қоймай құстарға жем шашып, көжектер мен тасбақаларды қызыға тамашалайды. Станциядағы жануарлар ерекше күтім қажет балаларға ем-дом болады.  

Ұлболсын Қалдырбекова, жас натуралистер станциясы директорының орынбасары:

- Кейбір жануарлар оларға қолдарына терапия, жануарлардың дауысы арқылы, көгершіндерге жем беру арқылы оларға терапия болады. Сол себепті көбіне бізге келетін оқушылар сол аутизммен ауыратын балалар.

Қазір жас натуралисттер станциясы уақытша жабық тұр. Жылдағы дәстүрге сай қар еріп, көктем туған шақта есігін айқара ашады. 

Авторлары: Мансұр Есқожин, Болатбек Молдағалиев, Айбек Даутов