АӨК: рекордтық өнім мен экспорт

Қазақстан астығы бүгінде әлемнің түкпір-түкпіріне тасымалданып жатыр. Өзбекстаннан бастап Италияға дейін отандық астық жеткізілуде. 

Егін шаруашылығындағы өсім экспортқа рекордтық көлемде өнім жеткізуге мүмкіндік берді. Бұл өткен жылмен салыстырғанда айтарлықтай жоғары көрсеткіш.

Отандық агроөнеркәсіп кешені Мемлекет басшысының тікелей бақылауында. Былтыр саланы қаржыландыруға 400 млрд теңге бөлінсе, биыл бұл сома рекордтық 700 млрд теңгеге дейін өсті. Қаражаттың егін науқанына дейін, яғни ерте бастан берілуі шаруаларға қажетті техника мен тыңайтқышты алдын ала қамдауға мүмкіндік берді.

Павел Рафальский, кәсіпорын директоры:

- «Мемлекеттің қолдауы өте зор. Қазір минералды тыңайтқыштардың басым бөлігі субсидияланады. Одан бөлек, «Кең дала» бағдарламасы бойынша егін себу кешендері мен тракторлар сатып алдық».

Наргиз Бекмағанбетова, тілші:

Қаржыландырудың тиімділігі биылғы өнім көрсеткішінен-ақ көрініп отыр. Егер екі жыл бұрын республика бойынша орташа түсім 11 центнерді құраса, бүгінде бұл көрсеткіш 17 центнерге жетті. Озық шаруашылықтар гектарынан 40 центнерден астам өнім алды. Нәтижесінде Қазақстан биыл 13,4 миллион тонна астық экспорттады.

Айдарбек Сапаров, ҚР Ауыл шаруашылығы министрі:

- 2026 жылғы егіс науқанын ерте қаржыландыру 2025 жылдың қазан айында басталды. Бүгінгі таңда мыңнан астам ауыл шаруашылығы тауар өндірушісі 95 млрд теңгеге қаржыландырылды. Бұл қаражат минералды тыңайтқыштарды дер кезінде енгізуге және агротехнологиялық талаптарды толық сақтауға жол ашты. Соңғы екі жылда тыңайтқыш қолдану көлемі үш есеге артып, 1,8 миллион тоннаға жетті.

Сала тек қаржыландырумен шектелмей, цифрлық форматқа көшіп жатыр. Қазір субсидиялар «Gosagro» порталы арқылы онлайн беріледі. 190 мыңнан астам қолданушы ветеринариялық құжаттарды электронды түрде рәсімдеуде.

Ермек Кенжеханұлы, ҚР Ауыл шаруашылығы вице-министрі:

- Бұған дейін мүлдем малы жоқ шаруашылықтардың төл жаздырған деректері анықталды. Мұндай заңбұзушылықтарды жою үшін ірі қараны «Төл» себебімен тіркеу кезінде бұзауды аналығына міндетті түрде байлау механизмі енгізілді. Бүгінде біздің жүйе малды тіркеп қана қоймай, ақпараттың сапалы сақталуын қамтамасыз етеді. Сонымен қатар жүйеде биологиялық жасы 20-дан асқан жануарлар кездесті, ветеринариялық-профилактикалық шаралардың 1,5 жылдан астам уақыт жүргізілмегені белгілі болды. Сондай-ақ ветеринарлар мен инспекциялар үшін хабарландыру функциясы болмағандықтан, бақылау қиындаған еді.

Қазіргі уақытта егістік пен өнімді қадағалайтын тағы екі цифрлық платформа әзірленіп жатыр. Мемлекет тарапынан жасалып жатқан бұл қадамдар аграрлық сектордың ашықтығы мен өнімділігін арттырудың кепілі.

Авторлары: Наргиз Бекмағанбетова, Әсем Утешова, Самат Қазанбаев