Жаңа техника диқандарға рекордтық өнім жинауға мүмкіндік берді

Жыл басынан бері фермерлерге жалпы құны 250 млрд теңге болатын 10 мыңға жуық ауыл шаруашылығы техникасы берілді. Ең көп сұранысқа ие техника - тракторлар (4 мыңнан астам, 99,3 млрд теңге). Артынан комбайн (732 бірлік), сеялка (775 бірлік) және егіс кешендері (99 бірлік) келеді.

Мұндай қарқынға «ҚазАгроқаржы» бастаған 5 пайыздық жеңілдетілген лизинг бағдарламасы серпін берді. Осы бағытта 6300 астам келісімшарт жасалып, 218,5 млрд теңге игерілген. Бағдарламаның артықшылығы – фермер артық несие жүгінсіз-ақ техникасын жаңарта алады.

Лизинг бойынша ең белсенді аймақтар  дәстүрлі түрде елдің астықты өңірлері, оның ішінде Солтүстік Қазақстан облысы – 37,5 млрд теңге (731 техника), Ақмола облысы – 35,7 млрд теңге (631 техника) және Қостанай облысы – 32,1 млрд теңге (941 техника).

Ақмола облысындағы «Шанырақ-Р» ЖШС шаруашылығы – осы жылдың табысты мысалы. Өңір шаруалары лизингтік бағдарламалар арқылы техника паркін қарқынды түрде жаңартып келеді. 

«Біздің шаруашылық 2003 жылы құрылған, алғашқы қадамдарымызды 2000-жылдардың басында жасадық. Ол кезде «ҚазАгроҚаржы» арқылы 4 пайыздық лизингпен техника алғанбыз. Сол қолдау көп фермерге демеу болды. Қазір бізде 54 мың гектар жер бар. Біз бидай, арпа, күнбағыс, зығыр және жасымық егеміз сияқты дәнді дақылдарды егеміз», – дейді шаруашылық басшысы Уәли Рахметов.

Оның айтуынша, 2025 жыл шаруашылық үшін сәтті болды. Биыл гектарынан 17 центнер өнім алынған. Бұл маусымда шаруашылық «ҚазАгроҚаржы» арқылы жаңа чизель соқалар, тырмалар және екі тіркеме техникасын да алған.

«Бұрынғы техника жұмыс ырғағына ілесе алмайтын. Ал жаңасы кідіріссіз, сенімді жұмыс істейді. Соқадан кейін шлейф тырма бір өтумен-ақ жерді тегістеп шығады. Осылайша уақытты да, күшті де үнемдейміз», – дейді ол.

Уәли Рахметовтың айтуынша, лизинг – ауыл шаруашылығын алға сүйрейтін ең тиімді құрал.

«ҚазАгроҚаржының» қолдауының арқасында ісіміз алға басты. Техниканы жаңарту нақты нәтижесін берді. Мен бұл салада көп жылдан бері істеймін, сондықтан мемлекет көрсетіп отырған мұндай көмекті шын жүректен бағалаймын», – деді ол.

Тағы да бір табысты мысалдың бірі – Солтүстік Қазақстан облысындағы «Қазына-1927» ЖШС. Оны тәжірибелі фермер Қуантай Аулабаев басқарады.

«Бұрын қиын еді, техника ескі болатын. Биыл «ҚазАгроҚаржы» арқылы құны 86 млн теңге тұратын жаңа Vector комбайнын алдық. Өткен жылы комбайнды жалға алу табысымыздың 15 пайызын жеп қойды. Енді сол ақша өзімізде қалды», – дейді ол.

Қуантай Аулабаевтың айтуынша, лизинг болмаса, мұндай жаңарту мүмкін болмас еді. Жаңа техника келгеннен кейін шаруашылықтағы жұмыс жылдам әрі үнемді бола түскен.

«Ескі техника жиі бұзылатын, қосалқы бөлшектері қымбат әрі сапасыз еді. Ал жаңасы кемі үш-төрт жыл ірі шығынсыз қызмет етеді. Егін де тез жиналады, өнім көлемі де артты. Сонымен қатар, қазір отандық комбайндардың өзі қымбат. Бірақ лизинг бізге демеу болды. Енді жалға төлеген ақшаны өз техникамызға жұмсаймыз. ҚазАгроҚаржы» мамандары құжаттарды жинауға көмектесті, бәрін түсіндіріп берді. Қаржыландыру тез шешілді. Мемлекеттің нақты қолдауын сезіндік», – дейді Қуантай Аулабаев.

2025 жыл агроөнеркәсіп үшін нақты серпіліс кезеңі болды. Фермерлер мол өнім жинап қана қоймай, техникалық жаңару арқылы еңбек тиімділігін еселеді. Бұл табыстың өзегінде мемлекеттің жүйелі қолдауы мен «ҚазАгроҚаржы» жүзеге асырған жеңілдетілген лизинг бағдарламалары тұр.

Жаңа техника – жай ғана құрал емес, ол ауылдағы өмір сапасын жақсартудың, еңбектің өнімді болашағын қалыптастырудың кепілі. Ал шаруалар тәжірибесі көрсеткендей, дұрыс қаржылық тетік бар жерде нәтиже де бар.