Ақмола облысында 300 млрд теңгеге астықты терең өңдеу зауыты салынады

Мемлекет басшысы Қасым-Жомарт Тоқаевтың агроөнеркәсіп кешенін дамыту жөніндегі тапсырмаларын іске асыру аясында ҚР Ауыл шаруашылығы министрлігі мен «Азия Алтын Дән» ЖШС арасында келісімге қол қоюға рұқсат берілді. Тиісті қаулыға Премьер-министр Олжас Бектенов қол қойды.

Жоғары технологиялық кәсіпорын Aqmola индустриялық аймағында 500 гектар аумақта бой көтереді. Жоба агроөнеркәсіп кешеніндегі өңдеу секторындағы ірі өндірістердің біріне айналмақ. Оның басты ерекшелігі – астықты биотехнологиялық тәсілмен, қалдықсыз терең өңдеу.

Жобаның жалпы инвестиция көлемі 300 млрд теңгені құрайды. Кәсіпорынның жылдық өндірістік қуаты 6 млн тоннаға дейін жетеді.

- Кәсіпорын толық цикл бойынша жұмыс істеп, жоғары қосылған құны бар өнімдер шығаруға бағытталады. Яғни ұн және жарма өнімдерінен бастап, ауыл шаруашылығы жануарларына арналған дайын жемге дейін өндіріледі. Бұл экспорт құрылымын әртараптандыруға, ішкі шикізатты тиімді пайдалануға және импортқа тәуелділікті төмендетуге мүмкіндік береді.

Жоба өңірдің әлеуметтік-экономикалық дамуына да ықпал етеді. Кәсіпорында шамамен 800 жаңа жұмыс орны ашылады. Сонымен қатар инвестор жыл сайын 40-қа дейін білікті техникалық және биоинженерлік мамандар даярлауды өз міндетіне алады. Бұл жұмыс үздіксіз білім беру жүйесі арқылы, соның ішінде шетелдік тағылымдамалар мен халықаралық алмасу бағдарламаларын қамти отырып жүзеге асырылады, - делінген ақпаратта.

Зауыт базасында ғылыми-зерттеу және технологиялық зертхана құру жоспарланған. Бұдан бөлек, инвестор индустриялық аймақтың инженерлік-коммуникациялық инфрақұрылымын дамытуға қосымша қаржы бөледі.

Кәсіпорын іске қосылғаннан кейін Астана – Қарағанды автомагистралінде жолайырық салу, сондай-ақ индустриялық аймаққа апаратын жаңа автожол мен теміржол инфрақұрылымын дамыту көзделген.

Инвестор өңірдің әлеуметтік инфрақұрылымын қолдауға да қатысады. Жоба толық іске қосылғаннан кейін білім беру, мәдениет, спорт, жастар саясаты және денсаулық сақтау салаларындағы бастамаларға тұрақты түрде қаржы бөлінеді.

Сонымен қатар зауыт пайдалануға берілгеннен кейінгі екі жыл ішінде жүзу бассейні мен жекпе-жек залдары бар көпфункционалды спорттық-сауықтыру кешенін салу жоспарланып отыр.

Жалпы алғанда, жоба елдің азық-түлік және экономикалық қауіпсіздігін нығайтып, өңделген өнімдердің экспорттағы үлесін арттыруға және Қазақстанның жоғары технологиялық агроөнеркәсіптік өнім өндіруші ретіндегі позициясын күшейтуге ықпал етеді.

Айта кетейік, бұл жоба агроөнеркәсіп кешенінде терең өңдеу бағытындағы ірі бастамалардың бірі саналады.

Еске салайық, Қазақстанда астықты терең өңдеу негізінде БИ-95 отыны өндірісі іске қосылғаны хабарланды.