Ақмола облысында дәрігер тапшылығы 20% азайды

Биыл Ақмола облысында дәрігерлерге төленетін көтермеақы көлемі екі есе ұлғайды, деп хабарлайды 24KZ. Мәселен, ауылдық жерлерге баратын жас мамандарға 8,5 миллион теңге төленсе, қалалық ауруханаға орналасқандар 5 млн теңгеден алады. «Мемлекеттік қолдау аймақтағы дәрігер тапшылығын шешуге мүмкіндік береді», – дейді жауаптылар. Қазір өңірде 200-ге жуық медицина маманы жетіспейді.

Ілияс Қожанов жұмысқа былтыр көктемде орналасқан жас маман. Қазір қала іргесіндегі Красный Яр ауылында жұмыс істейді. Бір ерекшелігі, ол осы ауылдың тумасы. Жоғары оқу орнын тәмәмдағасын бірден туған еліне келеді. Дәрігерге уәде етілген көтермеақы беріліп, қазір баспана мәселесі шешіліп жатыр.

Ілияс Мұқажанов, дәрігер:

- Біздің ауылдағы мекемеміз қаладағыдан кем түспейді. Өйткені мында өзіміздің жоғары дәрежелі дәрігерлеріміз бар. Солардың көмектерінің арқасында бізде осындай бір тәжірибе алмасып, өзіміз дәрігер қатарына қосылып жатырмыз.

Осыған дейін аймаққа жас мамандар көбіне басқа қалалардан келетін. Ал қазір болашақ дәрігерлер облыс орталығында да оқытылады. Биыл алғашқы 100-ден астам түлек оқуын бітіріп шықты. Олардың қатарында Динара Бекімова да бар. Жас маман өзінің еңбек жолын ауылдан бастауды жөн санапты.

Динара Бекімова, дәрігер:

- Мен «Дипломмен ауылға» бағдарламасы бойынша келдім. Кез келген жас маман ең алдымен осындай ауылдық жерлерде жұмыс істеп, тәжірибе жинақтау керек деп есептеймін. Биылдан бастап ауылға келген жас мамандарға 8,5 млн теңгеден көтерме ақы беріліп жатыр. Бұл үлкен қолдау. Мен әлі алғаным жоқ. Бірақ қажетті құжаттарымды тапсырып қойдым.

Жалпы Красный яр ауылындағы емханаға 16 мың адам тіркелген. Оның ішінде жақын маңдағы ауыл тұрғындары да бар. Ал бұл жандарға 20 медицина маманы қызмет көрсетеді.

Мақпал Айтпаева, Бастапқы медициналық-санитарлық көмек орталығы директорының орынбасары:

- Біздің ауылдық емханамызда жас мамандардың қатары жылдан-жылға артып келеді. Былтыр екі маман келсе, оның бірі жалпы тәжірибелік дәрігер, бірі педиатор маман. Биыл тағы екі маман келді. Екеуі де жалпы тәжірибелік дәрігерлер. Сол мамандардың арқасында біздің дәрігерлерге деген тапшылық жойылды.

Жыл санап аймақтағы дәрігер тапшылығы шешіліп келеді. Мемлекеттік қолдаудың арқасында биыл өңірдегі кадр тапшылығы 20% қысқарды.

Бақыт Төребекова, облыстық Денсаулық сақтау басқармасының бас маманы:

- Былтыр келген 117 жас маманға бірреттік әлеуметтік қолдау көрсетілді. Оған 492 млн теңге бөлінді. Биылдан бастап ауылдық жерлерге баратын жас мамандарға 8,5 млн теңгеден көтермеақы қарастырылған. Әзірге тек екі маманға ғана берілді. Оның бірі Жарқайың, енді бірі Қорғалжын ауданындағы ауруханаға жұмысқа орналасты.

Жалпы биыл өңірге 200-ден астам медицина қызметкері келген. Оның 60-тан астамы ауылдық жерге қызметке орналасты. Сонымен қатар осы жылы 93 жас маман баспанамен қамтылды.

Авторлары: Абзал Азаматұлы, Евгений Шинкаренко