Қостанай облысында дәрігер тапшылығы 20% қысқарды

Қостанай облысында биыл дәрігер тапшылығы 20 процентке қысқарды.

Былтыр өңірдегі жоғары білімді ақ халаттылар қатарын 310 маман толықтырды. Кешенді мемлекеттік қолдаудың арқасында медициналық кадр мәселесі ауылды жерлерде де оң шешіліп келеді.

Дәрігерлерді елді мекендерге тартып, тұрақтандыру мақсатында биыл оларға берілетін көтермеақы мөлшерін ұлғайту көзделіп отыр.

Ерлі-зайыпты Аман мен Ақзат Түркістаннан Қостанай облысының Әулиекөл ауылына екі жыл бұрын қоныс аударған. Екеуі де жоғары білімді дәрігер. Бірі терапевт, екіншісі педиатр. Жас отбасыға тиесілі барлық көмек-қолдау көрсетілген. 

Ақзат Серікбай, дәрігер-педиатр:

- Бес миллион тенге көтермеақы дейді, оның және отработкасымен жасалатын, сол берілді. Және одан бөлек, әкімдіктен 100 МРП тоже көмек берілді. Одан бөлек бізге жұмыспен қамтудан үйге берді. Алатын үйіміздің 50 пайызын суммасын төлеп беретін болды. Екеуміздікін қосқанда сонда жобамен 16 миллиондай ақша болып тұр. 

Аманның лауазымы көтеріліп, бүгінде Әулиекөл аудандық ауруханасы бас дәрігерінің орынбасары қызметін атқарады. Ал Ақзат аудандағы жалғыз педиатр. Сондықтан жұмысы қауырт. 

Ақзат Серікбай, дәрігер-педиатр:

- Бір күннің өзінде 80,90 тіпті 100 балаға дейін қабылдаған кезім болды. Қазіргі уақытта кішкене саябырсыды, дегенмен, бір күнде приказ бойынша 25 бала қабылдауымыз керек, дегенмен, одан көп бала қабылдаймыз. 

Аида Сәкенова, Әулиекөл ауылының тұрғыны:

- Біздің дәрігерлер, акушерлер өте мықты осы Әулиекөл ауданында. Сондықтан қалаға емес, осында келіп отырмын босануға. Барлық медициналық қызметтер көрсетіледі. 

Бұл ауруханаға әлі деп педиатр, онколог сияқты мамандар қажет. Облыс бойынша өткен жылдың басында 152 дәрігер жетіспейтін. Биыл бұл көрсеткіш 101-ге түсті. Ақ халаттыларды ауыл-аймаққа тартып, тұрақтандырып қалдыру үшін, оларды әлеуметтік қолдауға бюджеттен 600 миллион теңге бөлінген. Келген мамандардың әрқайсысына елді мекеннің шалғайлығына байланысты 3,5 миллионнан – 7 миллион теңгеге дейін көтермеақы берілді. Ал аса тапшы дәрігерлерге 8,5 миллион теңге көтермеақы ұсынылды. Биыл осы көмек-қолдау мөлшерін ұлғайту көзделуде. 

Еркебұлан Баязитов, облыстық денсаулық сақтау басқармасының басшысы:

- Келген мамандар көтермеақы алса, 7 жыл осы жерде жұмыс жасау міндетті болған. Соны биыл өзгертіп, 7 жылды 5 жылға төмендетіп жатырмыз. Сонымен қатар қалалық деңгейде 3,5 миллионннан 5 миллионға көтереміз бе деген жоспарымыз бар. Аудандық деңгейді 7 миллионға көтерміз бе деген ой, жоспар бар.

«Алдағы міндет, жоспарымызды жүзеге асырсақ, биыл дәрігерлер тапшылығын 50-60 процентке дейін қысқартамыз»,-дейді басқарма басшысы. 

Мағауия Қалиев, Ермек Мұхамедияров