Ақмола облысында пойыз вагонына шыққан жасөспірімнің денесінің 70 пайызы күйіп қалды

Ауыр жарақат алған бала ауруханаға жеткізіліп, жансақтау бөліміне жатқызылды, – деп хабарлайды Aikyn.kz сайты.

Оқиға 29 қазанда Шортанды ауданындағы теміржол станциясында болған. Екі жасөспірім серуендеп жүріп, пойыз вагонының үстіне шығуға шешім қабылдаған. Сол кезде олардың бірін электр тогы соққан.

Ақмола облыстық денсаулық сақтау басқармасының мәліметінше, зардап шеккен 15 жастағы баланың денесінің 70 пайызын күйік шалған. Дәрігерлер оған электр жарақаты және үшінші дәрежелі күйіктік шок диагнозын қойған.

Жасөспірім шұғыл түрде Шортанды аудандық ауруханасының қарқынды терапия бөліміне жатқызылған. Оның жағдайын бағалау үшін балалар реаниматологы Е. Жұмағалиевтің қатысуымен кеңес өткізіліп, санитариялық авиация арқылы қосымша маман шақырылған.

Шортанды аудандық ауруханасының хирург-травматологы Марат Дәулетов баланың басы мен мойнын екінші және үшінші дәрежелі, ал кеудесін, арқасы мен аяқтарын бірінші және екінші дәрежелі күйік шалғанын айтты. Дәрігердің сөзінше, науқастың жағдайы ауыр. Оны емдеуге облыстық күйік жарақаттары жөніндегі мамандар да қатысып жатыр.

Ал жасөспіріммен бірге болған екінші бала үйіне өздігінен оралған. Көліктегі полиция департаментінің хабарлауынша, оқиғаға байланысты Астана-1 станциясындағы көлік полициясы қылмыстық іс қозғады. Қазір оқиғаның мән-жайы мен себептері анықталып жатыр. Полиция теміржол вагонының үстіне шығу пойыз қозғалыссыз тұрған кезде де қауіпті екенін ескертті.