Ақмола облысында тәулігіне 1 миллион жұмыртқа өңдейтін зауыт салынады

Ақмола облысында тауық жұмыртқасын терең өңдеуге арналған ірі өндірістік кешеннің құрылысы басталады.
Жобаны «Kaz Eggs» серіктестігі жүзеге асырады. ҚР Ауыл шаруашылығы министрлігінің мәліметінше, жаңа кәсіпорын Ақмола облысының Целиноград ауданындағы Ақмол ауылында орналасады. Жобаға салынатын инвестиция көлемі 30 миллиард теңгені құрайды.

Болашақ зауыттың өндірістік қуаты тәулігіне 1 миллион жұмыртқаны өңдеуге жетеді. Кәсіпорын іске қосылғаннан кейін жұмыртқадан дайын және жартылай дайын өнімдер өндіру жолға қойылып, ауыл шаруашылығы өнімдерін терең өңдеу деңгейі артады.

Жоба 2027 жылдың төртінші тоқсанында пайдалануға беріледі деп жоспарланып отыр. Сонымен қатар өндіріс орнында 80 жаңа жұмыс орны ашылады.

Мамандардың айтуынша, бұл бастама отандық өңдеу өнеркәсібін дамытуға және қосылған құны жоғары өнім көлемін ұлғайтуға мүмкіндік береді. Сондай-ақ импортқа тәуелділікті азайтып, экспорттық әлеуетті арттыруға ықпал етеді.

Ауыл шаруашылығы министрлігі агроөнеркәсіптік кешенді дамытудағы негізгі бағыттардың бірі ауыл шаруашылығы шикізатын терең өңдеу екенін атап өтті. Осы мақсатта мемлекет заманауи өндірістер құруға, қазақстандық өнімнің бәсекеге қабілеттілігін арттыруға және елдің азық-түлік қауіпсіздігін нығайтуға бағытталған инвестициялық жобаларды қолдап келеді.

Сарапшылардың пікірінше, жұмыртқаны терең өңдеу өндірісін дамыту ішкі нарықты сапалы өніммен қамтамасыз етіп қана қоймай, Қазақстанның азық-түлік өнеркәсібіндегі экспорттық мүмкіндіктерін де кеңейте түседі.