АҚШ пен Израиль Хаменейді қалай тапты? Құпия операцияның егжей тегжейі жария болды

Иранның жоғарғы көшбасшысы аятолла Әли Хаменей қаза тапқан шабуыл көпшілік ойлағандай түн ортасында емес, таңертең жасалған, деп хабарлайды Arasha.kz.

ВВС-дің жазуынша, бұл АҚШ пен Израильдің бірнеше сағат бұрын ғана алған маңызды барлау мәліметін пайдалануға шешім қабылдауымен байланысты болды.

Бірнеше ай бойы олар жоғары лауазымды ирандық шенеуніктер бір жерге жиналатын сәтті күтіп келген. Ақырында Хаменейдің сенбі күні таңертең Тегеран қаласының орталығындағы бір ғимараттар кешенінде болатыны анықталған.

Сонымен қатар олар дәл сол уақытта кездесуге жиналған Иранның басқа да жоғары шенді әскери басшылары мен барлау қызметкерлерінің орналасқан жерін білген.

АҚШ пен Израиль бірнеше ай бойы Иранның жоғарғы көшбасшысының қозғалысын бақылап отырған. Бұл үшін қандай нақты әдістер қолданылғаны құпия күйінде қалды. Дегенмен АҚШ президенті Дональд Трамп әлеуметтік желідегі жазбаларының бірінде оған жанама түрде ишара жасаған.

«Ол біздің барлау қызметтерімізден және жоғары технологиялық бақылау жүйелерінен жасырын қала алмады», — деп жазды Трамп.

Хаменейдің нақты орналасқан жері жергілікті агент арқылы анықталған болуы мүмкін. Алайда сарапшылардың пікірінше, аятолланы заманауи технологиялардың көмегімен басқа ирандық шенеуніктердің қозғалысын бақылау арқылы есептеп шығарған болуы ықтимал.