АҚШ Путин мен Зеленскийдің жеке кездесуі жақын екенін жоққа шығармайды

АҚШ-тың жоғары лауазымды өкілдерінің айтуынша, Абу-Дабиде АҚШ, Ресей және Украина арасында өткен келіссөздер «өнімді» болды, тараптар белгілі бір ілгерілеуге қол жеткізген, деп хабарлайды Arasha.kz сайты Axios агенттігіне сілтеме жасап.

«Барлық мәселе талқыланды. Ешкім пікірталастан шеттетілген жоқ. Қаралмай қалған сұрақ болған жоқ және ешкімді мәжбүрлеуге тура келмеді. Елдердің өкілдері шынымен де шешім іздеді, барлығы бір-біріне құрметпен қарады», – деп мәлімдеді америкалық шенеунік.

Axios дереккөздерінің мәліметінше, Абу-Дабидегі кездесу келіссөздердің келесі кезеңіне өту жолындағы аса маңызды қадам болған. Шенеуніктердің бірі «Путин мен Зеленскийдің кездесуіне өте жақынбыз» деген пікір білдірген. Оның айтуынша, егер Абу-Дабиде өтетін келесі үшжақты кездесу одан әрі нәтижелі болса, бұл тараптардың Мәскеуде немесе Киевте жүздесуіне алып келуі мүмкін.