АҚШ та аю шабуылы туралы видео сақтандыру алаяқтығын әшкереледі

Оқиға 2024 жылдың қаңтарында басталған. Сақтандыру компаниясына Rolls-Royce Ghost көлігінің бүлінгені туралы өтініш түсіп, оған «аюдың» көлікті қиратып жатқан сәті бейнеленген видео тіркелген. Сол күні Mercedes G63 AMG және Mercedes E350 көліктеріне қатысты тағы екі ұқсас шағым түскен. Барлық жағдайлар аюлар кездесетін Лейк-Эрроухед ауданында болған.

Алайда сарапшылар алаяқтықты тез әшкерелеген. Калифорнияның балық және жабайы табиғат департаментінің биологы зақым жануардан емес, адам әрекетінен болғанын анықтаған. Бейнежазбада аю емес, арнайы костюм киген адам болғаны белгілі болды.

Осыдан кейін сақтандыру тергеушілері «Аю тырнағы» операциясын бастап, күдіктілердің үйлерінде тінту жүргізіп, аю костюмін тәркіледі.

– Бастапқыда сену қиын көрінген жағдай ақыры шындық болып шықты, ал кінәлілер заң алдында жауапқа тартылды, – деді Калифорнияның сақтандыру комиссары Рикардо Лара.

Тергеу барысында айыпталушылар – Алфия З., Рубен Т. және Вахе М. сақтандыру алаяқтығын мойындады. Сот шешімімен әрқайсысы 180 тәулікке бас бостандығынан айырылып, екі жыл шартты жаза алды.

Айта кетейік, АҚШ-тағы атыста сегіз баланы өлтірген күдікті олардың жетеуінің әкесі болып шықты.