АҚШ та екі қазақстандық есірткімен ұсталды

Техаста Қазақстаннан шыққан болуы мүмкін екі азамат – Нұрсұлтан Мұқтаралы мен Мухит Дәнібеков ұсталды, деп хабарлайды Arasha.kz.

27 қыркүйекте оларды Техастағы I-10 тас жолында жүк көліктерін тексеру кезінде полиция тоқтатқан.

Шериф кеңсесінің мәліметінше, Сигма атты қызметтік ит белгі беріп, тексеру барысында автовоздың құрылымының ішінен 35 кг кокаин табылған.

Қазір екі ер адамға ірі көлемде есірткі сақтау бабы бойынша айып тағылып отыр – бұл бірінші дәрежелі ауыр қылмыс болып саналады. Оларды Чемберс округінің түрмесіне қамады, әрқайсысына 200 мың доллар кепіл белгіленген.

Алайда туыстары олардың жалаға ұшырағанын айтады. Ұсталғандардың бірінің ағасы Жомарт Дәнібековтің айтуынша, Мухит пен Нұрсұлтан жүргізуші болып жұмыс істейді, көліктер тасымалдаумен айналысқан және олардың бірінде есірткі жасырылғанын білмеген.

«Олар Америкаға адал еңбек етуге барған, өзге біреудің қылмысы үшін жапа шегу үшін емес», – дейді Жомарт. Оның сөзінше, Мухиттің үш кішкентай баласы бар, ал әйелі ауыр науқасқа шалдыққан.