АҚШ та көлікті ұзақ қыздырғаны үшін 500 доллар айыппұл салынады

Ал АҚШ астанасында жүріс алдында көлікті үш минуттан көп қыздырса, 500 доллар айыппұл төлейді. Ал күн суық болса көп дегенде бес минут қыздыруға рұқсат. 1977 жылы қабылданған заң Вашингтон көліктерінен шығатын зиянды қалдықтармен күресудің бір амалы. 

Егер қозғалтқышы ұзақ қосылып тұрған көлікті қала тұрғындары көре қалса, арнайы қосымша арқылы құзырлы органдарға шағымдана алады. Өйткені мұнда көліктен шығатын түтін адам денсаулығына зиян деп экологтар дабыл қаққан. Бұл қысы Алматыға сәйкес келетін Вашингтондағы жағдай. Ал АҚШ-тың өзге де қалаларында айыппұл көлемі әртүрілі

Қысы қоңыржай Нью-Йоркте үш минуттан асыра қыздырсаңыз, алғашында 350 доллар айыппұл төлейсіз. Ал мектеп жанында бір минуттан асыруға болмайды. Қаңтары біздегі Оралға келетін Бостонда қыздыру уақытының лимиті 5 минут. Айыппұлы 100 доллардан басталады. Сынап бағанасы нөлден төмен жағдайда 15 минутқа дейін күтуге болады. Қысы Таразбен шамалас Филадельфияда да көлік қыздыру уақыты үш минут, ірі жүк көліктеріне бес минут деп шектеу қойылған. Айыппұл бұл қалада да 100 доллардан ары қарай өседі. Ал арктикалық суығы бар Алясканың орталығы Анкориджде заң басқаша. Көліктің қозғалтқышын қосып, тастап кетсеңіз, 20 минуттан асырмай рөлге отыруыңыз керек. Олай болмаған жағдайда 75 доллар төлейсіз.