Қалада көлікті қашан шырша әдісімен қоюға болады және бұзушылық үшін жүргізушілерге қандай айыппұл салынады

Қазақстанда жүргізушілерге көліктерін кез келген жерде "қиғаштап" (шырша түрінде) қоюға рұқсат етілмейді. Көлікті бұрышпен қою мүмкіндігі тұрақтың орналасуына және тиісті жол белгілерінің болуына байланысты.

Жол қозғалысы ережелері бойынша сарапшы Евгений Каримов Tengri Auto басылымына мұндай тұрақ әдісіне қай кезде рұқсат етілетінін және ережені бұзғаны үшін қандай айыппұл қарастырылғанын түсіндіріп берді.

Евгений Каримовтың айтуынша, жалпы ереже бойынша көлікті жүру бөлігінің жиегіне параллель қою қарастырылған.

"Мұнда бәрі қарапайым. Тұраққа тек жүру бөлігінің жиегіне параллель қоюға рұқсат етіледі. Тек осылай ғана", - деп түсіндірді сарапшы.

Көлікті бұрышпен, соның ішінде "қиғаштап" қоюға екі жағдайда рұқсат етіледі: егер көлікті тұраққа қою әдісін көрсететін тиісті жол белгісі орнатылса немесе тұрақ орны жүру бөлігінен тыс жерде орналасса.

Бұл ретте Каримовтың айтуынша, жолдағы қозғалыстың біржақты немесе екіжақты болуы маңызды емес.

Сарапшының сөзіне қарағанда, көлікті бұрышпен тек жеңіл автомобильдер мен мотоциклдер ғана қоя алады. Бұл шектеу, оның нақтылауынша, көлікті тұраққа қою әдісін көрсететін белгілердің болу-болмауына қарамастан қолданылады.

Жүк көліктері мен автобустар көлемі мен санатына қарамастан, жиекке (бордюрге) параллель тоқтауы тиіс.

Егер автокөлік жүру бөлігінде ереже бұза отырып қалдырылса және басқа көліктердің қозғалысына кедергі келтірсе, жүргізуші Әкімшілік құқық бұзушылық туралы кодекстің 597-бабы 3-бөлігі бойынша жауапкершілікке тартылуы мүмкін.

Каримовтың айтуынша, айыппұл көлемі 10 АЕК немесе 43 250 теңгені құрайды.

Бұл ретте көліктің бұрышпен қойылу фактісі жүргізушінің автоматты түрде ереже бұзғанын білдірмейді. Тұрақ орнының қайда орналасқанын және нақты сол жерде көлікті осылай қоюға рұқсат етілген-етілмегенін ескеру маңызды.

Тағы оқыңыз: Жолда бірнеше жолақ біріктірілгенде кім жол беруі керек: талдаймыз

Бізді Google-дың негізгі дереккөздер тізіміне қосыңыз