Атырауда 43 мың шаршы метр жаңа төсемтас төселеді

Атырау қаласында жаяу жүргіншілер аймағын абаттандыру мен жаңғыртудың ауқымды жұмыстары басталды. Қала бойынша жалпы көлемі 43 мың шаршы метрді құрайтын аумаққа жаңа төсемтас төсеу жоспарланған.

Қазіргі уақытта құрылысшылар Қаныш Сәтбаев даңғылындағы жұмыстарға кірісіп кетті. Әзірге жаяу жүргіншілер жолының алғашқы 3 мың шаршы метр аумағы қамтылып жатыр.

Жоба тек төсемтастарды ауыстырумен шектелмейді, бұл жерде кешенді қайта жаңарту шаралары жүргізіледі:

Ауыстырып, жаңарту: Ескі төсемтас толығымен алынып, ескі бетон бордюрлардың орнына төзімдірек гранит бордюрлар орнатылады.

Инфрақұрылым: Су ағар арық жүйесі жаңартылып, жол астынан өтетін инженерлік құбырлар желісі алмастырылады.

Жарықтандыру: Ұзындығы 4,8 шақырым болатын жол учаскесінің екі жағына да заманауи декоративті жарық бағандары орнатылады.

Сонымен қатар Орталық мешіт аумағындағы жөндеу жұмыстары аяқталып үлгерді — ондағы 3 мың шаршы метр аумақтың төсемтасы толық жаңартылды.

Сондай-ақ абаттандыру жұмыстары Студенттер көшесін де қамтиды. Онда аумақты көгалдандыру мен көркейтуден бөлек, балаларға арналған жаңа спорттық және ойын алаңдарын орнату көзделген.

Бүгін, 14:30