БҚО да былтыр 640 мың шаршы метр тұрғын үй тапсырылды

Батыс Қазақстан облысында барлық қаржыландыру көздерін қоса есептегенде 640 мың шаршы метр тұрғын үй тапсырылды.

Бұл былтыр атқарылған шаруа. Баспанаға мұқтаж жандарды пәтермен қамтуға бюджеттен 22 млрд теңге бөлінді. Соның ішінде алғаш рет 3 ауданда апатты үйдің тұрғындарына арнайы көп пәтерлі үйлер салынды. 

Бөрлі ауылының байырғы тұрғыны Ұмсындық Хасанова қазіргі қонысында бір қыстап шығыпты. Айтуынша, басыбайлы баспанасы болмай, ұзақ жылдар бойы туыстарын сағалап келген. Мүгедектігі бар жандарға биыл жаңа үй бұйырды. Жалпы аудан бойынша түрлі санаттағы 3351 адам баспана кезегіне тіркелген. Биыл ауданда 43 жеке тұрғын үй салынған.

Ұмсындық Хасанова, Бөрлі ауданының тұрғыны:

- Отағасының екі көзі де көрмей қалды. Содан зағип жан ретінде кезекке тіркелдік. Жыл сайын әкімдікке барып, кезегімізді тексеріп, керекті мәліметтерді ұсынып тұрдық. Ақыры бұйырған күні баспанаға қолымыз жетті. Үйіміз кең, жарық, жылы. Рахмет айтамыз үкіметке! 

Ал Орал қаласының тұрғыны Кенжебек Қауысов өткен жылы Ақжайық шағын ауданынан 4 бөлмелі пәтерге қол жеткізді. Көпбалалы жанұя қалаға 2007 жылы көшіп келген екен.

Кенжебек Қауысов, Орал қаласының тұрғыны:

- «Бақытты отбасы» бағдарламасы бойынша 2020 жылы үй кезегіне тұрып, 2025 жылы наурыз айында баспаналы болдық. 2% өте тиімді. 105 квадрат 20 млн 600 мыңға шығып тұр. 2025 жыл құтты жыл болды. Әр отбасына осындай баспана бұйырсын деймін! Келе жатқан 2026 жыл құт-берекелі болсын! 

Өткен жылы Орал өңірінде тұрғын үйді салуға және сатып алуға 21,8 млрд теңге бөлінген. Оның 7,2 млрды қазынадан қаралса, қалғаны мемлекеттік құнды қағаздар есебінен бөлініпті. Орал мен Ақсай қалаларында жалпы саны 1040 пәтерлік 7 көп қабатты үйдің құрылысы басталған. Ауылдық жерде жалпы саны 252 пәтерлік 14 үш қабатты үйдің іргетасы қаланған. Соның Оралда 3, Теректі ауданында 1 үй салынып біткен. Қазір «Отбасы банк» аталған пәтерлердің иесін анықтап жатыр.

Нұржан Қалишанов, "Отбасы банк" АҚ БҚОФ директоры: 

- Бізге берілген жаңа функция мемлекет тарапынан салынатын, сатып алып берілетін арендалық тұрғын үйлерді тұрғындарға бөліп беру 25 жылдың мамыр айынан бастап орталықтандырылған түрғын үй кезегін жүргізу, пәтерлерді бөлу функциясы бұрын мемлекет тарапынан жүзеге асатын, акимат тарапынан. Биылдан бастап «Отбасы банкке» жүктелді. Соның аясында қазірдің өзінде 300 ден астам пәтер 10 аудан бойынша облыстың өткізілді. Соларды аудандар бойынша тиісті кезекте тұрған азаматтарға бөліп беру процесі қазір жүріп жатыр.

Өткен жылы кезекте тұрған баспанаға мұқтаж жандарға бюджет есебінен 570 пәтер сатып алынса, апатты үйдің тұрғындарына Орал қаласында және Сырым ауданында 147 пәтер салынған. Жалпы облыста 42600 жан тұрғын үй кезегіне тіркелген.

Нұрбану Сатыбалдиева, БҚО Энергетика және ТКШ басқармасының бөлім басшысы:

- Соның ішінде көп балалы аналар 4554 адам, жетім балалар 2444 адам. 2025 қорытындысы бойынш тұрғын үй кезегінде тұрғандардың 363 адамы пәтермен қамтамасыз етілді. Мұның ішінде жетім балалар 49 пәтер алды, көп балалы аналар 137 пәтер алып отыр. 

Сонымен қатар өңірде салынатын тұрғын үйлерге инженерлік-коммуникациялық инфрақұрылым тартуға 10,7 млрд теңге бөлінген. Аудандарда жеке тұрғын үй салуға 1588 жер телімі дайындалуда.

Нұркен Молдашев, БҚО құрылыс басқармасының басшысы:

- Жыл қорытындысы бойынша жеке тұрғын үй құрылысына арналған 1582 жер учаскесін Бөрлі ауданында 680 жер телімі, Ақжайық ауданында 128 жер телімі, Теректіде 780 жер телімі инженерлік коммуникациясмен қамтамасыз етілетін болады. Көптеген жұмыс жасалып жатыр және ол келесі жылы да жалғасын табатын болады. Қаражатын келесі жылдың ойластырып жатырмыз.

Ерденбек Жылқайдарұлы, тілші:

- Құрылыс басқармасының мәліметіне сенсек, 2025 жылы Орал өңірінде барлық қаржыландыру көздерін қоса алғанда, 640 мың шаршы метр тұрғын үй тапсырылған. Жайық жеріндегі өткен жылда орын алған жағымды жаңалықтар жылқы жылына да жұғысты болсын! Баспанасыз жүрген барлық отбасы "өз үйім, өлең төсегім" деп айтар күнге жылдамырақ жетсін деп тілейміз. 

Е.Жылқайдарұлы, Қ. Ақрап, Б. Жарылғасов