АҚШ Венесуэла мұнайына көз тікті Сарапшылар

Николас Мадуро көп ұзамай биліктен кетеді.

Бұл Дональд Трамптың айтуы. Бірақ Құрама Штаттар Венесуэлаға басып кіре ме әлде басқа себеп бар ма? Ақ үй басшысы бұл жерде нені меңзеп тұрғанын ашып айтпады.

Бұдан 2 ай бұрын АҚШ Кариб теңізінде есірткі тасымалдаушыларға қарсы ірі әскери операция бастады. Сол операция басталғалы 64 адамның өмірі қиылды.

Ал сарапшылар есірткімен күрес тек сылтау ғана деп санайды. Сонда Президент Трамптың көксегені не?

Бұл АҚШ теңіз күштерінің дрондары түсірген кадрлар. Есірткі тасымалдаушылар мінген 2 бірдей кемеге жойқын соққы жасалған-ды. Су көліктерінің сау тамтығы қалмады. Борттағы 14 күдіктінің көзі жойылды.

Кейінгі 2 айда Венесуэла халқы әр күнін үреймен өткізуге мәжбүр. Өйткені Кариб теңізінде АҚШ-тың әскери операциясының тоқтайтын түрі көрінбейді. Енді сырттан әскер кіргізе ме деген уайыммен отыр. Таяуда Құрма Штаттар Венесуэланың іргесіне ұшақ таситын әлемдегі ең үлкен кемені шоғырландырды. Сондай-ақ сүңгуір кеме мен бірнеше әскери су көлігін орналастырған. Бұдан бөлек бомбалаушы B-52 мен радарда көрінбейтін F-35 жойғыш ұшағын аттандырған. “Вашингтон Пост” басылымының дерегі бойынша Кариб теңізіндегі АҚШ жауынгерлерінің саны 16 мыңға жетеді. Президент Трамп есірткі саудагерлерінінің көзін жоймақ. Қажет болса, Венесуэлаға жаяу әскер кіргіземін. Менің бұл шешімімді Конгресс бір ауыздан мақұлдайды, дейді.

Дональд Трамп, АҚШ Президенті:

- Әзірге соғыс жариялаудың қажеті жоқ. Біз тек елге есірткі кіргізетін жауыздардың көзін жоямыз. 

Алайда АҚШ-тың Венесуэланы айыптайтын нақты дерек-дәйегі жоқ. Сарапшылардың айтуына қарағанда, есірткі саудасының негізгі ошағы - Венесуэлада емес, Мексика мен Колумбияда орналасқан. Мәселен, БҰҰ-ның мәліметі бойынша, колумбиялық кокаиннің 87 пайызы Тынық мұхиты арқылы шетел асады.  

Николас Мадуро, Венесуэла Президенті:

- АҚШ жаппай қырып-жою қаруы немесе баллистикалық зымырандары бар деп айтайын десе, мұның ешқайсысы Венесуэлада жоқ. Сондықтан Құрама Штаттар бәрін ойдан шығарып жатыр. Таққан айыптарының бәрі өтірік.

Құрама Штаттар Мадуро билігін мойындамайды. Кейінгі президенттік сайлаудағы жеңісі заңсыз деп санайды. Ал есірткі саудагерлеріне қарсы операцияның түпкі мақсаты басқа. АҚШ-тың діттегені Венесуэланың мұнайы, дейді сарапшылар.  

Бұдан бөлек мұнайлы елде алтын, темір, боксит, ниобий секілді сирек металдардың мол қоры бар.  

ЦИТАТА: Рамон Лопес, халықаралық қатынастар бойынша сарапшы 

АҚШ-та күніне 20 млн баррель мұнай тұтынылады. OPEC-тің баяндамасында келтірілген деректерге қарағанда, Құрама Штаттарда энергетикалық шикізаттың қоры - 45 млрд баррель. Демек, бұл Америкаға 6 жылға жетуі мүмкін.

Сарапшылардың бірі бұл Вашингтонның қоқан лоқысы ғана деп сенген дұрыс десе, енді бірі Президент Трамп қарудың күшімен Венесуэладағы режимді құлатпақ, дейді.  

Бұл арада Николас Мадуро да қарап жатқан жоқ. Бес қаруын сайлап, шабуылға тойтарыс беруге әзірлігін бастап кетті. Тіпті Ресей, Қытай және Ираннан да әскери көмек сұрады. 

Зайнұр Байжігіт