Ақтауда кілем тоқушылардың халықаралық көрмесі басталды

Танымдық шара «Тас ескерткіштері - түркі әлемінің ортақ мұрасы» атты симпозиум аясында ұйымдастырылды.

Оған түркітілдес халықтардың темір дәуірінен бастап орта ғасырлық кезеңде тұрмыста қолданған кілемдері қойылды.  Жүзге жуық тарихи жәдігерді Әбіш Кекілбайұлы атындағы тарихи-өлкетану музейінде тамашалауға болады.

Түркі әлемі кілем тоқу өнерін ерте заманнан қолданған. Әр елде атауы өзгеше болғанымен тоқылу технологиясы бірдей. Қазақ пен қырғыздың, түркімен және әзербайжан халқының қолмен өрнек тоқуы ұқсас келеді. Көрмеге тақыр, түкті, алаша, текемет кілемдер қойылған. Симпозиумға қатысушылар түрікмен, әндіжан, қарабақ секілді түркі стилінде тоқылған тоқыма бұйымдарды музей қорына тарту етті.

Талғат Исламұлы, тілші:

- Музей қорына сыйға берілген құнды жәдігердің бірі - осы текемет. Ұзындығы 7, ені 3 метр. Ақ текеметті 30 қолөнерші бірлесе басып шығарды. Олардың 8-і шетелдік, қалғандары қазақстандық қолөнершілер. 

Толқын Түйешиева, музейдің ғылыми қызметкері:

- Бұл текеметтің бетінен өзіміздің қазақтың ұлттық оюларымен қатар түркітілдес елдердің де ұлттық оюлары басылған. Бұл көрмеде тоқсаннан астам музей қорындағы жәдігерлер көрмеленген. Оның ішінде табиғи жүннен, жіптерден басылған, тоқылған кілемдерді көреміз. Киіз үйдің ішкі төсеніштерін, бау-шуларын көруге болады және киіз үйдің жиһаздары да көрмелеген.

«IV түркі әлемі музейлерінің кездесуі» тақырыбындағы симпозиум Түрксой ұйымының қолдауымен өтті. Соған орай Ақтауға Түркия, Мажарстан және Кипрден ғалымдар келді. Шетелдік делегаттар өңірдің киелі орындарына зиярат жасауға ниетті. Жалпы жыл басталғалы Маңғыстауда 38 ауқымды шара өтті. Оларды мыңдаған турист тамашалады.

Сұлтан Раев, ТҮРКСОЙ ұйымының бас хатшысы:

- Бұл бір ғана мәдени шаралар ғана емес. Екіншіден Ақтаудың, Маңғыстаудың туристік жағын күшейту бойынша да жасалуда. Туризмге жәрдем беруге біздің әр шарамыздың зор мәнісі бар. Ақтау секілді мәдени астанамызды Бельгияда, Еуропарламентте де танытайын деген ойымыз бар, ЮНЕСКО-да. 

Көпке мәлім, биыл Ақтауға түркі әлемінің мәдени астанасы мәртебесі берілді. Осы аралықта жаһандық туристік форум, фотосурет және картиналардың көрмесі, қуыршақ пен театр фестивалі ұйымдастырылды. Түркітілдес елдердің салт-тәстүрі мен мәдениеті әлемге дәріптеліп, ұмыт бола бастаған ұлттық құндылықтарымыз ұлықталды. Бастысы, бауырлас жұрт түпкі тарихы мен тамырын танып, өзара байланыс нығайды. 

Талғат Исламұлы, Ренат Досалиев