Ақтауда қазақ өнері мен әдет ғұрыпы насихатталды

Ақтаудағы Әбіш Кекілбайұлы атындағы Маңғыстау облыстық тарихи-өлкетану мұражайының алаңында «Қазақ өнері мен әдет-ғұрып фестивалі – Ұмытылмас өнер» мәдени іс-шарасы өтті, деп хабарлайды Egemen.kz Маңғыстау облыстық Қоғамдық коммуникация орталығына сілтеме жасап.

Іс-шара Маңғыстау облысының Мәдениет, тілдерді дамыту және архив ісі басқармасының тапсырысы бойынша, Бірыңғай грант операторы – Азаматтық бастамаларды қолдау орталығының қолдауымен және «Алтын Оймақ» қолөнерді қолдау қоғамдық қорының ұйымдастыруымен «Мәдениет пен өнерді дамыту» және «Ұмытылмас өнер» бағыты аясында жүзеге асты.

Фестивальдің басты мақсаты – ұлттық мәдениет пен дәстүрлі қолөнерді насихаттау, шеберлер арасындағы тәжірибе алмасуды дамыту, жас ұрпақты ұлттық рухта тәрбиелеу және қазақтың қолөнерін жаңғыртуға үлес қосу болды.

Іс-шараға қала тұрғындары мен қонақтары, жастар, колледж студенттері, мәдениет басқармасы мен мұражай өкілдері, мемлекеттік органдар, бұқаралық ақпарат құралдары, үкіметтік емес ұйымдар және қолөнер шеберлері қатысты.

Фестиваль бағдарламасында киіз үйді тігу және  жығу процесін көрсету, ұлттық қолөнер көрмесі, сәнгерлер мен зергерлердің жұмыстарын таныстыру, шеберлік сабақтары, сондай-ақ жастарға арналған танымдық іс-шаралар ұйымдастырылды.

Жарыс қорытындысында үздіктер «Ең жақсы жүннен жасалған бұйым», «Ең үздік тоқыма бұйымы», «Ең жақсы ағаш бұйымы»,«Ең жақсы зергерлік бұйым», «Ең жақсы керамикалық бұйым», «Ең жақсы ши», «Ең жақсы кәдесый», «Ең жақсы дәстүрлі қазақ кестесі» номинациялары бойынша анықталды.