Қазақ өнері Үндістан төрінде

Қазақ әні әлем мәдениетінің ежелгі орталығы – Үндістанда әуеледі.

Қазақстан өнерпаздары Үндістанның Ченнаи қаласында өткен 11-ші Ғаламдық музыка фестиваліне қатысты. Ұйымдастырушылар «Бұл екі ел арасындағы мәдени-гуманитарлық байланысты нығайтудағы жаңа белес» деп бағалады. 

Ченнаидағы халықаралық фестиваль 25 елден келген жүздеген әртістің басын қосты. Қазақ мәдениетін паш етуге Астанадағы Еркеғали Рахмадиев атындағы Мемлекеттік академиялық филармониясы, «Гәкку» балет би ансамблі, сондай-ақ Ғазиза Жұбанова атындағы Ақтөбе облыстық филармониясының Қазақ камералық хоры атсалысты.

Қайрат Нұрмолда, Үндістандағы Қазақстан Елшілігінің дипломаты:

- Концерт өте керемет әсер қалдырды. Үнді көрермендеріне концертте қазақ әндерінің, оның ішінде Абайдың, Тәттімбеттің, қазақ классикалық шығармаларының орындалуы үлкен әсер қалдырды. Мұндай концерттік бағдарламалар екі ел арасындағы бірінші кезекте мәдени дипломатияны одан әрі нығайтуға септігін тигізеді.

Үнді жұрты мен шетелден барған қонақтар қазақтың классикалық музыкасымен танысып, дәстүрлі билерін тамашалады. Сахна төрінде Абайдың әндері шырқалып, Құрманғазының күйлері тартылды. Бағдарлама аясында біздің өнерпаздар үндістандық көрнекті музыканттар – Лакшминараяна Субраманиам және Кавита Кришнамуртимен бірлесіп концерт қойды. 

Гүлдана Шоқпарова, Үкілі Ыбырай атындағы Ақмола облыстық филармониясы «Гәкку» би ансамблінің солисі:

- Концертте атақты композитор Субраманиаммен, дирижер Абзал Мирасбекұлымен, композитормен жұмыс істеу біз үшін үлкен мәртебе. Осы елде Қазақстанның атағын шығарып, намысын қорғау біз үшін зор құрмет. Индияның мәдениетімен танысу біз үшін қызық.  

Аталған жоба қазақ-үнді мәдени дипломатиясының жарқын үлгісін көрсетіп, халықтар арасындағы өзара түсіністікті нығайтуға, сондай-ақ Қазақстанның халықаралық мәдени беделін арттыруға ықпал етті. Бұған дейін концерттік бағдарламалар Калькутта, Дели, Чандигарх қалаларында ұсынылды. Гастрольдік сапар Бангалор қаласында жалғасады.

Авторлары: Мөлдір Жақан, Ернат Рахметолла