Ақтауда жас өнертапқыштардың жобалары таныстырылды

Ақтауда археологтардың жұмысын жеңілдететін инновациялық жоба таныстырылды. Сырт пішіні өрмекші тәріздес робот жер аумағын сканерлеп, пайдалы қазбаның бар-жоғын көрсетеді. 

Қазір шаһарда ел чемпионаты өтіп жатыр. Дәстүрлі сайыс робототехниканы «болашақтың мамандығы» деп қабылдайтын дарынды жеткіншектердің басын қосты.

Ел чемпионаты өтіп жатқан ғимарат іші жерасты кен орнын игеретін алаң тәрізді. Биылғы сайысқа қатысушылар «Археология және жер қойнауындағы қазба байлықтар» тақырыбында жобаларын ұсынды. Цифрлық сканермен жабдықталған бұл робот жер қойнауындағы қазба байлық, көне жәдігерлерді іздеуге арналған. Ақылды құрылғы қашықтан басқарылады.

Ескендір Тәңкиев, чемпионатқа қатысушы:

- Қазба жұмыстарынан кейін жердің астындағы температура мүлдем басқа. Артефакттар сол температураға үйренген. Егер біз оны жер үстіне шығарсақ, температура сәйкес келмей сынып қалуы мүмкін. Археологтарда немесе музейлерде көптеген проблемалар бар. Соның ішінде экспонаттарды музейге тасу. 

Жас өнертапқыштардан құралған келесі топ интерактивті шыны конструкцияны таныстырды. Музейлерге арналған құрылғы ультракүлгін сәуледен қорғайтын жабынмен қапталған. Ол жарықтың әсерін азайтып, жәдігердің сақталуына көмектеседі.

Азамат Қобыланов, чемпионатқа қатысушы:

- Көптеген дағдыларды қалыптастырды. Бірінші жылы инженерлік дағдыларды, яғни біз LEGO-ны қалай құрастыру керек, роботты қалай құрастыру керек екенін түсіндік. Біздің жобаны басқа адамдарға түсіндіру арқылы біз көпшілік алдында сөйлеу дағдысын қалыптастырдық. 

Данияр Ерматов, ұйымдастыру алқасының мүшесі:

- 12-ден 18-ге дейінгі балалар қатысады. Олар әртүрлі роботтарды жасайды. Сол роботтар арқылы алаңда жарысады. Әртүрлі бағдарлама тәсілдерін, алгоритмдерді қосып матчтарда жеңу. Алаңдағы матчтар төрт команданың арасында өтеді. 

Сайыста 12 команда сынға түсті. Үздіктері Орталық Азия чемпионатының іріктеу кезеңіне жолдама алады. Сонымен қатар инновациялық деп танылғандар ақпан айында Астанада өтетін халықаралық жарысқа қатысады.

Авторлары: Талғат Исламұлы, Ренат Досалиев