Ақтаудағы блогерге Instagram дағы видеосы жүз мыңдаған теңгеге түсті

Ақтаулық блогерге Instagram-да жарияланған видеоны өшіру және азаматтардың бейнесіне деген құқығын бұзғаны үшін өтемақы төлеу міндеттелді, деп хабарлайды Tengrinews.kz Жоғарғы сотқа сілтеме жасап.

Соттың мәліметінше, блогер өз парақшасында қылмыстық іс бойынша тергеу әрекеттерінің бейнежазбасын жариялаған. Кадрларда іс бойынша жәбірленуші ретінде танылған Ақтаудың екі тұрғыны бейнеленген.

Кейін олар өз бейнесін пайдалануға және таратуға келісім бермегендерін айтып, сотқа жүгінген. Олар видеоны өшіруді және келтірілген моральдық зиян үшін өтемақы өндіруді талап етті.

Ақтау қаласының № 2 соты Азаматтық кодекстің 145-бабына сәйкес, заңда тікелей көзделген жағдайларды қоспағанда, азаматтың бейнесін оның келісімінсіз пайдалануға жол берілмейтінін еске салды.

Жауапкердің қоғам қайраткері немесе штаттан тыс журналист екендігі туралы уәждерін сот қабылдамады. Сонымен қатар сот бейнежазбаның ашық қолжетімді жерде жариялануы, сондай-ақ оған жазылған жағымсыз пікірлер талап қоюшылардың моральдық зардап шегуіне себеп болды деген қорытындыға келді.

Сот жарияланымды заңсыз деп танып, блогерге Instagram-дағы парақшасынан видеоны өшіруді міндеттеді. Сондай-ақ одан моральдық зиян өтемақысы ретінде екі талап қоюшының әрқайсысына 200 мың теңгеден, барлығы 400 мың теңге өндірілді.

Сот шешімі заңды күшіне енді.

Еске сала кетейік, бұған дейін Алматыда блогер Әділетхан Молдаханға үкім шыққан болатын, ол әл-Фараби даңғылындағы адам өліміне әкеп соққан шулы жол-көлік оқиғасынан кейін көрінеу жалған ақпарат таратты деп айыпталған еді.

Google News арқылы жаңалықтарымызды қадағалаңыз