Ақтөбеде 16 өңірдің тұрғындарын алдаған қылмыстық топ мүшелері қамауға алынды

Қаржылық мониторинг агенттігінің (ҚМА) Ақтөбе облысы бойынша департаменті интернет-алаяқтыққа жәрдемдесу, заңсыз кәсіпкерлікпен айналысу, дропперлік қызметті ұйымдастыру және қылмыстық жолмен алынған табысты заңдастыру фактілері бойынша сотқа дейінгі тергеп-тексеру жүргізіп жатыр.

Тергеу мәліметіне сәйкес, Ақтөбе қаласында әрекет еткен қылмыстық топ телефон және интернет алаяқтары азаматтардан алдап алған ақшаны қабылдап, оны түрлі қаржылық операциялар арқылы заңдастырып отырған.

Қылмыстық топтың құрамында 10-нан астам адам болған. Олар қылмыстық схеманы жүзеге асыру үшін еліміздің әр өңірінен 150-ден астам дропперді пайдаланған.

Тергеу барысында күдіктілердің банк қосымшалары мен криптоәмияндар орнатылған ұялы телефондарды қолданғаны анықталды. Осы арқылы олар дропперлердің банктік шоттарын қашықтан басқарып, қаржы аударымдарын олардың тікелей қатысуынсыз жүзеге асырған.

Блокчейнді талдау нәтижесінде ақшаны жылыстатудың толық тетігі анықталды. Алдымен жәбірленушілердің қаражаты бірнеше банктік шот арқылы өткізіліп, кейін дропперлердің есепшоттарына аударылған. Одан соң бұл қаражат криптовалюта платформалары арқылы USDT цифрлық активіне айырбасталған.

Петропавлда 120 млн теңгені қолды қылған дропперлер сотталды

Қылмыстық әрекетті заңды етіп көрсету үшін жалған қарыз шарттары мен жалған компаниялар пайдаланылған. Кейін заңсыз табыс қолма-қол ақшаға айналдырылып, шетел валютасына айырбасталған.

Қазіргі уақытта Қазақстанның 16 өңірінен 80 жәбірленуші анықталды. Алдын ала есеп бойынша келтірілген материалдық шығын 120 млн теңгеден асты.

Сот санкциясымен қылмыстық топтың 8 мүшесі қамауға алынды, ал тағы 2 күдікті үйқамаққа алынды.

Сондай-ақ күдіктілердің мүлкіне тыйым салынды. Оның ішінде 8 пәтер, бір автокөлік және 52 мың USDT көлеміндегі цифрлық актив бар.

Банк шотын есірткі сатушыларға берген 10 дропперге қатысты қылмыстық іс қозғалды

ҚМА мәліметінше, сотқа дейінгі тергеп-тексеру жалғасып жатыр. Өзге мәліметтер Қазақстан Республикасы Қылмыстық-процестік кодексінің 201-бабына сәйкес жария етілмейді.