Ақтөбеде көктемгі су тасқынына дайындық басталды

Тосыннан болатын табиғи апаттың алдын алу үшін өзен арналары тазартылып, жағалары бекітіліп жатыр. Облыс орталығында су басу қаупі бар 18 учаскеде инженерлік жұмыстар қолға алынды. 

Жіңішке өзенінің бойында 10 саяжай ұжымы бар. Бұрын бау-бақша егіп, тек маусымдық пана болған лашықтардың орнында іргетасы мығым баспаналар пайда болды. Күллі бір үлкен ауданға айналды. Қазір төрт мыңнан аса адам тұрады. Көктемде өзен бойындағы үй иелері жанын шүберекке түйіп келді. 

Мансұр Есқожин, тілші:

- Жіңішке өзені қазір сылдырап ағып жатқанымен көктемде сел жүріп, арнасынан тасиды. Жақын маңдағы баспаналарға жылда қауіп төнеді. Сондықтан саяжайлар маңындағы жағасы бекітіліп жатыр. Суға тосқауыл болар бөгеттің биіктігін бес метрге жеткізді. 

Бір шақырымнан астам жағалай тұрғызылған бөгеттің ені 6 метрге жетеді. Ол тасқын кезінде қарғын сумен келетін мұзға да төтеп беруі тиіс. 

Әділет Қазбанов, мердігер мекеме директорының орынбасары:

- Былтыр бұл дамбаны солдаттардың арқасында қапшықпен, құммен ұстап қалды. Негізі су көтерілген кезде жағасынан шығып кету қауіпі болды. Послойно грунтпен көтеріп, катать етіп, бут таспен нығайтып жатырмыз. Жұмыстың қазіргі уақытта 90 пайызы орындалды. 

Шаһардың Астана ауданына тиесілі аумағында су басу қаупі бар 11 учаске анықталған. Өзен жағалауымен бірге дала суы жиылатын арықтар мен су өткізу құбырлары да кеңейтіліп жатыр. Бұл мақсатқа қала бюджетінен 434 млн теңге бөлінді. 

Баянбек Қырықбаев, Астана ауданының әкімі:

- Тұрғындардың өтініштерін және ТЖД түскен ұсыныстарды ескере отырып біз тиісті смета жасақтап, конкурстық рәсімдерді өткіздік. Нәтижесінде төрт мердігер ұйым анықталды. Олар негізінен Думан, Сазды, Көкжиде, Таңшолпан, Оңтүстік-Батыс, Жаңақоныс тұрғын алаптары мен Алтын Орда, Авиатор шағын аудандарында жұмыстар жүргізіліп жатыр.

Көктемдегі тасқынға тосқауыл болар арықтар шаһардың іргесіндегі елді мекендерде де қазылып жатыр. Бұл арналар 39 разъезд пен Қурайлы ауылдарын еріген қардан қорғауы тиіс.

Авторлары: Мансұр Есқожин, Айнадин Молдабеков, Айбек Даутов