Ақтөбеде мемлекеттік наградалар табысталды

Республика күніне орай 36 ақтөбелік мемлекеттік наградамен марапатталды. Президент жарлығымен «Парасат», «Құрмет», III дәрежелі «Еңбек Даңқы» ордендері мен «Ерлігі үшін», «Ерен еңбегі үшін», «Шапағат» медальдері табысталды. Өңірде егемендіктің бастауы болған ұлттық мерекеге орай салтанатты іс-шара өтті.

Елімізді дербес еткен, тарихи декларация қабылданған күнге арналған салтанатты шара орталық саябақта басталды. Қоғам қайраткерлері мен әскерилер, қала тұрғындары сап түзеп, еліміздің көк байрағы көтерілді.

Республика күні қоғамдық қызмет пен білім беру, денсаулық сақтау, өнеркәсіп, мәдениет және ауыл шаруашылығы салаларының дамуына үлес қосқан азаматтарға мемлекеттік наградалар табысталды. Өңірге танымал невропатолог Гүлсім Тәңірбергенова 30 жылдан астам денсаулық сақтау саласында қызмет етіп келеді. Білікті маман «Ерен еңбегі үшін» медалімен марапатталды.

Гүлсім Тәңірбергенова, дәрігер-невропатолог:

- Жасап жатқан еңбегімізді елеп, осындай наградаға ұсынғандары үшін көп рақметімді айтамын. Халық үшін әлі де қызмет ете береміз. Денсаулық сақтау жоғары бағалануы тиіс. Себебі ең зор байлық осы денсаулық. Денсаулықты әрқашан да сақтау керек. 

Ақбөпе Әбдуәлиева болса 40 жыл ғұмырын мемлекеттік қызметке арнаған. Шалғайдағы шағын ауылдың гүлденуіне үлес қосты.

Ақбөпе Әбдуәлиева, зейнеткер:

- Алға ауданы, Қарағаш ауылдық округінде 20 жылға жуық әкім болып қызмет істедім. Ол кезде өте қиын кезең болды. Халықта пенсия жоқ, жалақы жоқ. Жарық бір жанады, бір сөнеді. Бірақ сонда да халықты үлкен жақсылыққа, болашаққа сендіріп жетелеп, ауылға газ өткіздім. Сол еңбектерімді бағалап "Құрмет" орденіне ұсынды. Өте қуаныштымын.

Президент атынан мемлекеттік наградаларды табыстаған облыс әкімі Асхат Шахаров Республика күнінің ел тарихындағы маңыздылығын атап өтті. Қазақстанның қарыштап дамуына адал еңбегімен үлес қосқан азаматтарға алғысын білдірді. Мерекелік шара халқымыздың тарихы мен рухани жетістіктерін бейнелеген «Қыран елім - Қазақстаным» концертіне ұласты. 

Авторлары: Мансұр Есқожин, Айнадин Молдабеков, Айбек Даутов