Ақтөбеде университет ғимаратының құрылысы басталды

Ақтөбеде халықаралық университеттің жаңа ғимаратының құрылысы басталды. Ұлыбританияның жетекші техникалық университеті филиалы екі жыл бұрын Мемлекет басшысының тапсырмасына сай ашылған еді. 

Білім ордасы бұған дейін Құдайберген Жұбанов атындағы Ақтөбе өңірлік университетінде орналасқан. Қазір негізгі оқу-зертханалық корпусының құрылысы қолға алынды. 

Хериот-Уотт университетінің Ақтөбедегі кампусында 518 студент білім алады. Олар «Электр энергетикасы», «Компьютерлік инженерия», «Мұнай инженериясы және энергия менеджменті» мамандықтарын игеріп жүр. Білім беру бағдарламасы халықаралық стандартқа сай. Ақтөбе кампусының түлегі британдық және мемлекеттік үлгідегі қос диплом алады. 

Лаура Қарабасова, Қ. Жұбанов атындағы ақтөбе өңірлік университетінің ректоры:

- Қазір біз министрліктің тарапынан барлық қолдауды алып отырмыз. Қаржылық жағынан қолдау бар. Енді біздің мақсатымыз фокусты сапаға қою арқылы ең алғашқы бірінші түлектеріміздің легін шығару. Бұл студенттерге деген сенім, олардың оқып жатқан біліміне деген сенім және олардың артықшылығы – олар жай ғана инженерлік кадрлар емес ағылшын техникалық тілін өте жақсы меңгерген мамандардың алғашқы легі. 

Университеттің жаңа оқу-зертханалық корпусы ғылыми-зерттеулердің әлеуетін кеңейтуге бағытталған. Мың студентке арналған ғимарат жобасы халықаралық стандарттарға сай болады. Жалпы еліміздегі жоғары оқу орындары шетелдік университеттермен стратегиялық серіктестік құру арқылы жаңа белестерді бағындырды. Білім ордаларында қосымша 162 бағдарлама ашылды. Қазір бұл мамандықтарда 9418 студент білім алып жүр. Оның ішінде 392 адам шетел азаматы. Бұл ғаламдық академиялық білім беру кеңістігінен орын алуға бағытталған мемлекеттік саясат нәтижесі. 

Гүлзат Көбенова, ҚР Ғылым және жоғары білім вице-министрі:

- Мемлекет басшысының тапсырмасына сәйкес Қазақстанда жоғарғы білім саласында қазір интернацияландыру саясаты жүргілізіп жатыр. Бүгінгі күні Қазақстан академиялық білімнің бір орталығы ретінде қалыптасып отыр. Қазіргі сәтте еліміздің 12 өңірінен келіп балалар білім алып жатыр. Алдағы уақытта әле де бүкіл Қазақстаннан және шетелден де келеді деген үміттеміз.

Елімізде 2022-жылға дейін шетелдік бес университеттің филиалы жұмыс істеп келген. Соңғы үш жылда олардың саны 33-ке жетті. Тағы жеті жоғары оқу орындарымен меморандумға қол қойылып, Қазақстан аумағында кампус ашу жөнінде келіссөздер жүргізіліп жатыр. 

Авторлары: Мансұр Есқожин, Айнадин Молдабеков, Айбек Даутов