Ақтөбеде жаңа стадионның құрылысы басталды

Еліміздегі ең үлкен футбол стадионы облыс орталығындағы «Алтын орда» әлеуметтік-іскерлік орталығының құрамына енеді.

Сонымен қатар бұл ауданда облыстық драма театры, көпфункционалды спорт кешені де салынып жатыр. Үш жоба да ел Президентінің тапсырмасы аясында жүзеге асырылуда. Футболсүйер қауым «Ақтөбеге» жаңа стадион қажет» дегелі бірнеше жыл болды. Жарты ғасыр бұрын ашылған Қобыланды батыр стадионына көрермен сыймайды. Еуро ойындарында тіпті ине шаншар орын болмай, жанкүйерлердің бәріне бірдей билет жетпей қалатын. Сондықтан жаңадан салынып жатқан стадион 35 мың көрерменге арналған. 

Ержан Мұздыбаев, облыстық Құрылыс, сәулет және қала құрылысы басқармасының басшысы: 

- Стадионның жалпы аумағы 25 гектарды құрайды. Театр мен спорт кешенінің жалпы аумағы 6 гектарды құрайды. Бұл Алтын орда мөлтек ауданында. Осы жерде салынатын саябақпен қатарлас орналасқан.

Аталған кешендер жалпы аумағы 166 гектар болатын «Алтын орда» әлеуметтік-іскерлік орталығының алғашқы нысандары болмақ. Қазір құрылысшылар іргетасын қалауға кірісті. Стадион мен спорт кешені ғимараты 2027 жылдың төртінші тоқсанында тапсырылуы тиіс.

Асхат Шахаров, Ақтөбе облысының әкімі:

- Барлық инфрақұрылым бар. Қаланың ортасы деп айтуға болады. Тек қана стадион емес, соның айналасында инфрақұрылымды, бизнесті дамытуға өте қолайлы. Инфрақұрылыммен қатар жаңа академия салуға тапсырма берілді. Былтыр өзіміздің академия ашылды. Оған қоса тағы үлкен академия салуды жоспарлап отырмыз. 

Ел Президентінің пәрменімен салынып жатқан тағы бір ғимарат – облыстық драма театры. Мәдениет ордасына 700 көрермен сыяды. Құрылыс жұмыстары қазан айында басталды. Әлеуметтік нысандардың қасына Қазақстан картасын бейнелейтін «Алтын орда» саябағы салынады. Облыс басшысы Асхат Шахаров бұл аудан қаланың сәулеттік келбетіне көрік беріп қана қоймай, жаңа тартымды орынға айналатынын жеткізді. 

Авторлары: Мансұр Есқожин, Айнадин Молдабеков, Айбек Даутов