Қазақстанда iPhone 18 верификациясы қайта басталды

Қазақстанда iPhone 18 желісіндегі смартфондарды верификациялау қайта басталды. Бұл туралы құрылғы иелері хабарлап жатыр. Ақпаратты "ҰАТ" АҚ да растады, деп хабарлайды Tengri Life.

Неге iPhone 18-ді верификациялау мүмкін болмады?

Бұған дейін шетелден әкелінген iPhone 18 желісіндегі смартфондарды верификациялау kz-imei.kz сайтында техникалық жұмыстар мен қосымша қауіпсіздік шараларын енгізуге байланысты уақытша тоқтатылған болатын.

Бұл ретте құрылғылар қазақстандық операторлар желісінде жұмыс істей берді.

"ҰАТ" АҚ техникалық жұмыс аяқталып, қосымша қорғаныс шаралары енгізілгеннен кейін жеке тұлғалар үшін iPhone 18 (Apple) желісіндегі құрылғыларды Egov мобильді қосымшасында және https://portal.imei.gov.kz порталында верификациялау қайта басталғанын хабарлады. Компания өкілдері уақытша шектеу верификация рәсіміне ғана қатысты болғанын атап өтті.

"Верификациядан өттім"

iPhone 18 Pro иесі, қазақстандық Әділ Молдабековтің айтуынша, ол portal.imei.gov.kz порталында верификациядан өтті.

"Егер смартфон арқылы кірсеңіз, 2–3 кезеңнен тұратын бейнебақылаудан өту керек, ал компьютер арқылы растау SMS арқылы жүреді. iPhone 18 моделі әзірге тізімде жоқ, сондықтан атауын қолмен енгізу қажет. Осыдан кейін жүйе екі IMEI кодын да қабылдайды және тексеріс небәрі 10–15 минутта өтеді. Шекарадан өткені туралы анықтаманы тіркеудің енді қажеті жоқ, тек кірген күнді көрсетсе жеткілікті, база деректерді автоматты түрде салыстырады", - деді ол бізге берген сұхбатында.

Анықтама: IMEI (International Mobile Equipment Identity) - бұл мобильді құрылғының басқа смартфондардан ажыратуға мүмкіндік беретін бірегей 15 таңбалы сәйкестендіру нөмірі. Екі SIM-карталы смартфондарда әдетте екі IMEI болады - әр слотқа бір-бірден.

Сондай-ақ ол қазақстандықтарға осы анықтамаларды сатып алуға қатысты ықтимал алыпсатарлық туралы ескертіп, деректерін үшінші тұлғаларға бермеуге шақырды. Әрбір анықтама бір адамға ғана есептелген, деп атап өтті жас жігіт.

Енді қай жерде верификациялау керек: мән-жайы

9 қазаннан бастап жеке тұлғалар верификациядан portal.imei.gov.kz мемлекеттік порталы немесе eGov Mobile қосымшасы арқылы өте алады.

eGov Mobile қосымшасында "IMEI верификациясына өтінім" қызметі "Танымал қызметтер" бөлімінде қолжетімді.

Верификациялауға арналған бұрынғы kz-imei.kz сервисі бұдан былай пайдаланылмайды. Бұл туралы бұған дейін телефондарды верификациялаумен айналысқан "ATS Mediafon KZ" компаниясы хабарлады.

Тағы не өзгерді?

Басты жаңалық – міндетті бейне сәйкестендіру.

Енді өтінім берген кезде жаңа смартфон иесі жеке басын қосымша растауы керек.

Бейне сәйкестендіру өтінімді деректер иесінің нақты өзі беріп жатқанын растайды.

Шекарадан өткені туралы анықтаманы өз бетіңізше алу керек пе?

Жоқ. Бұрын пайдаланушыға мұндай анықтаманы vmp.gov.kz арқылы бөлек алып, оны жүктеп, өтінімге қоса тіркеуге тура келетін.

Енді жүйе қажетті мәліметтерді верификация кезінде автоматты түрде алады.

Мәселе туындаған жағдайда не істеу керек?

Өтінім беру кезінде қиындықтар туындаса, 1414 Бірыңғай байланыс орталығына хабарласуға болады.

Смартфондарды верификациялау бұған дейін сынға ұшыраған

Бұған дейін сәуірде IMEI-верификация тетігі қазақстандықтар мен депутаттар тарапынан сұрақтар туғызған болатын. Атап айтқанда, неге рәсімді жеке компания жүргізетіні және пайдаланушылардан қандай негізде ақы алынатыны талқыланды.

Сыннан кейін цифрлық даму бірінші вице-министрі Ростислав Коняшкин бұл тәсілді өзгерту жоспарланып отырғанын: верификацияны мемлекеттік ұйымға беруді көздеп отырғандарын хабарлады.

"Біз мемлекеттік монополияға көшеміз деген шешім қабылданды. Бұл телефондарды верификациялау бойынша қызмет көрсете алатын мемлекеттік ұйым болады", – деген еді ол.

Вице-министрдің айтуынша, ол үшін тиісті заңнамалық өзгерістер дайындалды.

Тағы оқыңыз: iPhone 18-ді шетелден сатып алған қазақстандықтар мәселеге тап болды

Бізді Google-дың негізгі дереккөздер тізіміне қосыңыз

Қосу