Ақтөбеде жасөспірімдерді кіргізген екі ойын сауық мекемесі жабылды

АСТАНА, 24 қазан – Sputnik. Ақтөбеде бір айда ата-анасының бақылауынсыз жүрген 300-ге жуық жасөспірім анықталды, деп хабарлайды облыстық полиция департаментінің баспасөз қызметі.

"Учаске" жедел-профилактикалық іс-шарасы аясында ақтөбелік полиция рейдтік іс-шараларды күшейтті.

"Ақтөбе қаласында кәмелетке толмағандардың сағат 22.00-ден кейін заңды өкілінсіз келуге рұқсат берген екі ойын-сауық мекемесінің қызметі уақытша тоқтатылды. Бірінші жағдайда компьютерлік клубта 2010 жылы туған кәмелетке толмаған қыз заңды өкілінсіз жүрген. Тағы бір жағдайда 2008 жылы туған жасөспірімнің түнгі мезгілде лаундж-барда жүргені белгілі болды", - дейді ведомство.

Бұл мекеме иелері бұған дейін де осындай заң бұзушылыққа жол бергені үшін жауапкершілікке тартылған, әкімшілік құқық бұзушылық бір жыл ішінде қайталанып отыр.

"Жалпы "Учаске" жедел-профилактикалық іс-шарасы басталғаннан бері облыс бойынша заң бұзған 292 кәмелетке толмаған жасөспірім анықталды. Олардың басым көпшілігі полиция бөліміне түнгі мезгілде көшеде заңсыз жүргені үшін жеткізілді. Ата-аналары әкімшілік жауапкершілікке тартылып, жасөспірімдермен тиісті түсіндіру жұмыстары жүргізілді", - дейді полиция департаменті.

Рейд кезінде қоғамдық орындарда алкогольдік ішімдік ішкен 3, түнгі мезгілде ойын-сауық орындарында заңсыз жүрген 12 жасөспірім анықталды.