Astana Half Marathon 2026: Жаңа рекорд орнады

Фот. Қала әкімдігі

Астана әкімдігінің ресми сайтының мәліметінше, биыл жарыс жолына 243 шетелдік желаяқ шыққан. Олар әлемнің 30-дан астам елінен келген.

Шетелдік қатысушылардың ең көбі Ресейден – 91 адам, Өзбекстаннан – 28 және АҚШ-тан – 17 адам. Сондай-ақ жарысқа Қытайдан 15, Қырғызстаннан 14, Франциядан 11, Оңтүстік Кореядан 6, Ұлыбританиядан 6, Польшадан 5 және Германиядан 5 адам қатысты. Жарыс географиясы Азия, Еуропа, Солтүстік және Оңтүстік Америка, Африка, Таяу Шығыс пен Мұхит елдерін қамтыды.

Жыл сайын Astana Half Marathon әлемнің әртүрлі елдерінен келетін қатысушылар санын арттырып келеді.

«Мұндай қызығушылықтың себептерінің бірі – ұйымдастыру деңгейінің жоғары болуы. Astana Half Marathon Халықаралық марафондар мен жүгіру жарыстары қауымдастығына (AIMS) кіреді, ал оның бағыттары World Athletics стандарттарына сәйкес сертификатталған. Бұл қашықтықтың дәлдігін және нәтижелердің әділдігін қамтамасыз етеді. Сондықтан көптеген тәжірибелі желаяқ жеке рекордын жаңарту үшін Астанадағы жарысты таңдайды», дейді «Бірінші болу – батылдық» корпоративтік қоры қамқоршылық кеңесінің төрағасы Ғалымжан Есенов.

Айта кетейік, «Таза Қазақстан» акциясы шеңберінде жарыс бағыты бойында және старт-мәре қалашығында қоқыстарды бөлек жинау орындары және қатысушылар мен қонақтарға арналған интерактивті экологиялық аймақтар жұмыс істеді. EcoNetwork-пен серіктестік шеңберінде жиналған жарамды қоқыс қайта өңдеуге жіберіледі.

«Astana Half Marathon жарысының басты экологиялық жаңалықтарының бірі – PET 1 таңбасы бар, 100 пайыз қайта өңделетін пластиктен жасалған бір реттік стақандар. Олар барлық тамақтану орнында пайдаланылып, жарыс аяқталғаннан кейін экологиялық еріктілер қайта өңдеуге жіберу үшін жинастырды.

Мұндай тәжірибе Қазақстандағы бұқаралық жүгіру жарыстарында алғаш рет енгізіліп отыр», делінген хабарламада.

Бұған дейін Елордада марафонға байланысты ондаған көше жабылатын туралы хабарлаған едік.