Астана көшелерін су басып, көлік қозғалысы қиындады

АСТАНА, 23 шілде – Sputnik. Бүгін Астанада жауған нөсер жауыннан кейін қала көшелерін су басты, деп хабарлайды Sputnik Қазақстан.

Түстен кейінгі жаңбырдан кейін желіде суға батып жатқан көліктердің видеосы тарады.

Мәселен, Бауыржан Момышұлы даңғылы мен Асқар Тоқпанов көшесінің қиылысында судың деңгейі жеңіл көліктің капотына дейін жетіп тұр. Ал Байтұрсынұлы мен Аманжолов көшелерінің қиылсында тротуарлар судың астында қалды. Адамдар аялдамада отыратын жерге мініп алып, автобусты күтуге мәжбүр. Ал жолаушылар автобустың ішіне кіріп жатқан суды түсіріп, желіде таратып жатыр.

Tarlan Astana станцияларының бірінде төбеден су ағып жатқан сәтті тұрғындар түсіріп алған.

Қазгидроменттің мәліметіне сәйкес, алдағы күндері Астанада +25...+29 градус ыстық, тағы жаңбыр жауады.

Айта кетері, Астанада нөсер жауыннан кейін қала көшелері жиі суға толып кетеді. 2018 жылы сол кездегі әкім Әсет Исекешев премьер-министрге осы мәселеге қатысты жоспарын айтқан еді. Ал 2023 жылы "Elorda eco system" директоры Тимур Шоданов қызметінен босатылған болатын.