Өскемен көшелерін неге түтін басып тұр Қазгидромет өкілі жауап берді

Бүгін таңертең тұрғындар қала көшелерін қою түтін тұмшалап тұрғанын байқады.

– Өткен демалыс күндері өңірде жылы ауа райы байқалды. Ал оның артынан суық фронтальды аймақтар келді. 27-28 қазан күндері қалада жаңбыр жауды, ал облыс аумағына суық әрі тұрақты антициклон орнады, яғни ылғалды әрі суық ауа массасы қалыптасты. Ауа температурасының төмендеуі, ылғалдың жоғарылауы және желсіз ауа райы - осының бәрі төменгі ауа қабаттарында су буының конденсациялануына әсер етті. Соның нәтижесінде бүгінде қалада тұман байқалып отыр, - дейді «Қазгидромет» РМК Шығыс Қазақстан және Абай облыстары бойынша метеорологиялық болжау бөлімінің бастығы. 

Оның айтуынша, алдағы тәулікте де осындай ауа райы сақталады. 

– Яғни ертең де Өскеменде тұман күтіледі. Күндізгі ауа температурасы суық болып қала береді. Ауа райы жұма күні өзгереді деп күтіп отырмыз. Жұма және сенбі күндері ауа температурасы жоғарылап, оңтүстік-шығыстан жел соғып, тұман біртіндеп сейіледі, - дейді Любовь Бухтоярова. 

Еске салсақ, осыған дейін Өскеменде ауа сапасының нашарлауынан кейін 4 адам ауырғаны хабарланған.