Астана соты лифтіде қызға тиіскен азаматтың ісін қарады

Астанада тұрғын үй кешеніндегі жеделсатыда кәмелетке толмаған қызға тиіскен азамат 15 тәулікке қамалды. 

Бұл туралы Астана қаласының әкімшілік құқық бұзушылықтар жөніндегі мамандандырылған ауданаралық сотының баспасөз қызметі хабарлады. 

Соттың мәліметінше, 2026 жылдың 11 ақпанында сағат 11:00 шамасында Б. есімді азамат тұрғын үйдің бірінші қабатында лифт күтіп тұрған. Онымен бірге 2014 жылы туған кәмелетке толмаған қыз бала да лифт күтіп тұрды. Кабина келгенде, бірінші болып қыз, содан кейін ер адам кірді.

Сот талқылауы барысында анықталғандай, лифтіде бала кабинаның бұрышына тұрып қалды, ал ер адам оны айналып өтіп, ең аз қашықтықта артынан тығыз орналасып, рюкзакты түртіп кеткен, соның салдарынан ол иығынан түсіп кеткен. Сол сәтте кабинада екеуі ғана болған. Қыз бала бұрылып қарағанда, ер адам лифтіден шығып кеткен.

Сот өз әрекеттерімен ер адам кәмелетке толмаған баланың жеке кеңістігі мен тыныштығын қасақана бұзып, ҚР ӘҚБтК-нің 434-бабының 1-бөлігінде көзделген ұсақ бұзақылық жасады деген қорытындыға келді.

Сот отырысында Б. кінәсін мойындамады және өзінің бұл қылығының себептерін түсіндірмеді. Жәбірленушінің заңды өкілі болған оқиғадан кейін қыз баланың үйіне мазасызданып оралып, болған жағдайды айтып бергенін хабарлады.

Баптың санкциясы айыппұл, қоғамдық жұмыстар немесе 15 тәулікке дейінгі әкімшілік қамауды көздейді. Сот жеңілдететін мән-жайларды анықтаған жоқ, ал ауырлататын ретінде құқық бұзушылықтың кәмелетке толмаған адамға қатысты жасалуын мойындады.

Құқық бұзушылықтың сипаты мен құқық бұзушының кім екенін ескере отырып, сот оны кінәлі деп танып, 15 тәулікке әкімшілік қамауға алу жазасын тағайындады. Қаулыда қамауды қолдануды болдырмайтын мән-жайлар жоқ.

Бүгін, 16:21