Астанада 9 жасар қызға тиіскен Өзбекстан азаматы қоғамдық жұмысқа жегілді

Астананың қылмыстық істер жөніндегі ауданаралық сотында 16 жасқа толмаған адамдарға сексуалдық сипатта тиісті деген айыппен шетелдік азамат Ахмаджон Кузибаевқа қатысты сот процесі аяқталды, деп хабарлайды Arasha.kz.

Тергеу мәліметтері бойынша, өткен жылдың тамыз айында 40 жастағы ер адам екі баласымен (9 жасар қыз және 4 жасар ұл) жатақханада тұратын таныс әйелге қонаққа келген. Әйел жұмысқа асығып бара жатқандықтан, олар сыртта кофе ішіп, кейін әйел кетіп қалған, ал Ахмаджон шаштаразға бет алған.

Алайда, біраз уақыттан соң анасы аяқ киімін ұмытып кеткенін есіне түсіріп, үйіне кенеттен оралады. Сол кезде ол танысының ас үйде сыра ішіп отырғанын көреді. Кузибаев шаштараздың ашылуын күтіп отырғанын айтып ақталған, деп жазды Kozachkov offside телеграм арнасы.

Анасы қайтадан жұмысқа кеткен соң, Өзбекстан азаматы балаларға жаңғақ беріп, кейін қыз баланы тізесіне отырғызып, оны сүйіп, денесіне қол жүгірте бастаған. Бала қорыққан соң, Ахмаджон балаларға балмұздаққа ақша беріп, бұл туралы ешкімге айтпауды өтінген. Бүлдіршіндер дүкенге пижамамен жүгіріп барып, болған жайтты сатушыға бірден айтып берген.

Сатушы дереу әрекет етіп, ол күйеуін Кузибаевты іздеуге жіберіп, полиция шақыртқан. Ер адам ұсталды, бірақ оны тіпті қамауға да алмады, себебі оның әрекеті «қылмыстық теріс қылық» ретінде сараланды. Қылмыстық кодекстің 121-1-бабына сәйкес, кәмелетке толмағандарға сексуалдық сипатта тиіскені үшін бізде түрмеге жаппайды.

Сол себепті де Ахмаджон Кузибаев небәрі 200 сағат қоғамдық жұмысқа тартылды. Жәбірленушінің адвокаты оны 50 тәулікке қамауды сұраған, бірақ судья Данияр Жүнісов бұл жаза түрі 2027 жылдың 1 қаңтарына дейін қолданылмайтынын атап өтті.

Сондай-ақ, сотталушыға зардап шеккен қызға және оның отбасына жақындауға тыйым салынды. Кузибаевтың елден шығарылатыны немесе Қазақстанның кішкентай қыздарына қонаққа баруды жалғастыра беретіні әзірге белгісіз.

Үкім заңды күшіне енген жоқ және артында көптеген сұрақ қалдырды.