Хуситтер Сауд Арабиясына жасалған шабуылдарға қатысты АҚШ қа үндеу жасады

Йемендік хуситтер АҚШ-қа Қызыл теңіздегі америкалық кемелерге шабуыл жасамайтынына сенім білдірді. Бұл туралы дүйсенбі күні қозғалыстың жоғары лауазымды өкілі Вашингтонның топқа қарсы жоспарланған соққылардан соңғы сәтте бас тартқаны туралы хабарларға жауап бере отырып мәлімдеді, деп хабарлайды Tengrinews.kz Euronews басылымына сілтеме жасап.

Хуситтердің саяси бюро мүшесі Мохаммед әл-Бухайтидің айтуынша, Вашингтон осы айдың басында олардың Йеменнің батыс жағалауы бойымен Баб-эль-Мандеб бұғазына қарай жедел ілгерілеуінен кейін қозғалыспен байланысқа шыққан.

"Біз бұғазда АҚШ-ты немесе басқа елді нысанаға алмайтынымызды растадық, жалғыз ерекшелік – Сауд Арабиясы секілді жау тарап. Бұл ұстаным қазір де өзгеріссіз қалады", – деді ол.

Әл-Бухайти хуситтердің бірнеше майданда соғыс жүргізуге мүмкіндігі бар екенін атап өтіп, "егер қандай да бір ел Сауд Арабиясы жағында Йеменге қарсы агрессияға араласатын болса", соққы беретіндерін ескертті.

"Бүгінгі таңда Йемен тек ішкі қақтығысты емес, халықаралық текетіресті де жүргізуге қауқарлы", – деді ол.

Оның сөзінше, хуситтердің көршілес Сауд Арабиясына шабуылдары Эр-Рияд Йеменнің хуситтер бақылауындағы аймақтарына он жылға созылған блокаданы тоқтатып, кемелердің олардың қарамағындағы Қызыл теңіз порттарына кіруіне рұқсат бергенше жалғаса береді. Содан кейін ғана олар келіссөздерге дайын болады, деп нақтылады ол.

Әл-Бухайтидің бұл мәлімдемесі америкалық БАҚ-тың АҚШ президенті Дональд Трамп жексенбіде соңғы сәтте хуситтерге соққы жасаудан бас тартқаны туралы хабарларынан кейін жасалды. Трамп Сауд Арабиясының нақты көшбасшысы, мұрагер ханзада Мұхаммед бин Салманмен сөйлескеннен кейін, Иран қолдайтын топтың позицияларына соққы жасау туралы шешім қабылдап, бірақ бірнеше сағаттан соң одан бас тартқан.

Кейінгі апталарда хуситтердің Йеменнің жаңа аумақтарын басып алған жедел шабуылдары жүздеген адамның өліміне әкеп соқты. БҰҰ-ның босқындар ісі жөніндегі Жоғарғы комиссар басқармасының дерегінше, бұл жағдай 110 000-нан астам адамды өз үйлерін тастап кетуге мәжбүр еткен.

Хуситтер Йеменнің Қызыл теңіз жағалауы мен маңызды аралдарын өз бақылауына алды. Олардың мақсаты – энергия ресурстарын жеткізу және жаһандық кеме қатынасы үшін аса маңызды теңіз дәлізі саналатын Баб-эль-Мандебті иелену. Иран Ормуз бұғазын бұғаттағаннан кейін бұл дәліздің маңызы бұрынғыдан да арта түсті.

Қозғалыс өкілдері Баб-эль-Мандебтегі кеме қатынасына саудиялық кемелерден басқа ешқандай қауіп жоқ деп сендірді.

Соғыс қимылдары шикі мұнайдың әлемдегі ең ірі жеткізушісі саналатын Сауд Арабиясынан келетін экспортқа, сондай-ақ теңіз бағыттарының жұмысына кедергі келтіріп үлгерді.

Ресми түрде "Ансар Алла" деп аталатын хуситтер Тегеранның "қарсылық осі" құрамына кіреді. Бұл – аймақтың түрлі елдеріндегі қарулы топтар желісі. Оның ішінде Ливандағы "Хезболла", Газадағы ХАМАС және Ирактағы көптеген құрылымдар бар. Олардың барлығы Ислам революциясы сақшылары корпусынан (ИРСК) әртүрлі деңгейде қолдау, дайындық және қару-жарақ алып отырады.

Бізді Google-дың негізгі дереккөздер тізіміне қосыңыз