82 жылдық рекорд жаңармады Қазақстанда тамыз айы қандай болды

2026 жылдың тамыз айы Қазақстанда ыстық әрі кей жерлерде жаңбырлы болды. Жекелеген өңірлерде ауа температурасы +40 градустан асса да, өткен жылдардағы абсолюттік температуралық максимумдар жаңара қоймады, деп хабарлайды Tengrinews.kz тілшісі.

Аптап рекордтық көрсеткіштерге жетпеді

"Қазгидромет" мәліметінше, әсіресе Қызылорда, Түркістан, Павлодар және басқа да облыстарда күн қатты ысыған.

10 тамызда Қызылордада ауа температурасы +42,5 градусқа дейін көтерілді. Бұл ретте осы күн мен бақылау кезеңі үшін абсолюттік максимум +44,7 градусты құрайды - ол 2002 жылғы 9 тамызда тіркелген болатын.

15 тамызда Түркістанда термометр бағаны +41,5 градусқа жетті. Мұндағы тарихи максимум айтарлықтай жоғары - +46,5 градус, ол 1947 жылдың 20 тамызында орнатылған.

Павлодарда 11 тамызда ауа +37,3 градусқа дейін жылыса, осы кезеңдегі рекордтық көрсеткіш +40,6 градусты құрайды және ол 2002 жылы тіркелген.

Алматыда 16 тамызда температура +38,6 градусқа дейін көтерілді. Ай бойы термометр бағаны бұл көрсеткішке тағы бірнеше рет жақындады: 28 тамызда +35,8, ал 31 тамызда +36,8 градус болды.

Алматыдағы тамыз айының абсолюттік максимумы +40,5 градусты құрайды. Бұл көрсеткіш 1944 жылдың 9 тамызында тіркелген - бұл рекордтың сақталып тұрғанына 82 жыл болды.

Сонымен қатар басқа қалаларда да аномальді ыстық байқалғанымен, ол тарихи максимумдардан аспады.

Астанада 1 тамыз айдың ең ыстық күні болды - температура +38,4 градусқа дейін көтерілді.

Айдың соңында ауа райы күрт өзгерді. 31 тамызға қараған түні Астанада температура +5,6 градусқа дейін төмендеді.

Тамыз айы елорда үшін айтарлықтай жауын-шашынды болды. Бір ай ішінде 50 миллиметр жауын-шашын түсті, бұл айлық норманың 160 пайызын құрайды.

Өңірлерде де нөсер жауын байқалды. Мәселен, 17 тамызда Павлодар облысындағы Ертіс метеостанциясында айлық нормасы 39 миллиметр бола тұра, 43 миллиметр жауын-шашын түскен.

26 тамызда Шығыс Қазақстан облысындағы Теректі метеостанциясында 37 миллиметр жауын-шашын тіркелді, ал мұндағы айлық норма - 29 миллиметр.

Бізді Google-дың негізгі дереккөздер тізіміне қосыңыз